-Ka rukom ai sha hapoh kali, la hikai naduh mynbarim ha shnong Mihmyntdu: Trai dukan-
“Tang shu pynpah ki draibar (Driver) ïa ka Horn napoh kali mar mar poi ka sha ka dud bad ka bam ka dih hapoh kali”, kum kane ka kam la shakhi ha kawei na ki shnong hapoh ka West Jaiñtia Hills District ïa kaba la hikai ïa kane ka kam naduh kipor ba mynshwa da ki trai dukan kiba don ha katei ka shnong.
Ïa kane ka rukom ai sha, la leh ha kawei ka shnong kaba la tip kum ka shnong Mihmyntdu kaba ïasoh bad ka sor Jowai lyngba u surok bah NH-44 (Barim) bad ïa kane ka kam la pynmlien (practice) naduh kipor ba mynshwa haba ki seng ïa ki dukan sha jong ki. Kane ka rukom ai sha kala pynsuk haduh katta katta ïaki paidbah kiba wan dihsha ha kitei ki dukan, ha kaba kim donkam shuh ban hiar napoh kali ne ban leit rung hapoh dukan hynrei tang shu pynpah ïa ka horn napoh kali ki nongtrei ki la wan mar mar ban tyrwa aiu ki donkam bad tang hapoh khyndiat minit kila ïoh ïa ki jingbam ba ki kwah.
Na ka por sha ka por kiba bun na ki paidbah (costumer) na sor Jowai bad na kiwei de ki shnong ba marjan ki juh sngewtynnad bha ban leit dihsha ha kitei ki dukan kiba don ha ka shnong Mihmyntdu lada dei ha ki por mynstep, mynsngi bad wat ha ki por janmiet ruh.
Katkum ka jingwad jingtip jong u nongthoh khubor ïa kane ka rukom ai sha, sha ki kali kiba pynïeng hajan ki dukan jong ki, la sdang tang ha ki bynta jong ka shnong Mihmyntdu naduh ki por ba mynshwa, hynrei ha ka jingïaid jong ka por mynta la don katto katne tylli ki dukan ha ki bynta ka Jowai kum ha Main Road Ladthadlaboh ruh kila leh ïa kane.
U nongthoh khubor haba ïakren bad kawei naki trai dukan kaba don ha Mihmyntdu (Mookynphad) kaba don ïaka dukan la 5 snem mynta kala pyntip ba ïa kane ka rukom sam sha, sha ki kali kila leh naduh ki por mynshwa bad haduh mynta ki dang bud sah ïa kane ka rukom.
Kala pyntip ki don ki paidbah (Customer) kiba sngewtynnad ban dihsha hapoh kali bad ki don ruh kiba wan rung hapoh dukan, hynrei ki nongtrei ha ki dukan jong ki, ki long kiba kloi ban leit ai jingbam ïa ki paidbah wat hapoh kali khlem da kheiñ tam ïaka dor (extra charge).
Wat ki nongtrei kiba leit rah jingbam sha ki kali ruh kila tip lypa ïa kane ka kam kaba ki dei ban trei namar naduh ba sdang ïa kane ka kam ki trai dukan kila dep ban pynbeit bad pynsngewthuh shwa bad ki, kala ong ruh kum ki nongshong dukan kim lah shuh ban pynduh ïa kane ka rukom khlem da don kano kano ka jingpynbeit lang.
Uwei na ki nongñiah kali kamai haka por ba wan dihsha hapoh kali ha kawei ka dukan ula ïathuh bunsien kim ju rung shuh shapoh dukan, namar manla ka por ki la mliem ban dihsha bad ban bam ja hapoh kali, da kaba pynsngew ruh wat ki trai dukan ki long kiba kloi ban wan rah ïaki jingbam hapoh kali la ha kano kano ka por la shit ne slap ruh kim juh salia, na kata ka daw ka pynsngewtynnad ïa kiba bun ki nongñiah kali bad wat ki riew paidbah ruh ban wan dihsha ha Mihmyntdu.
