Ka Jaiñtia National Council (JNC) ka pynrem jur bad thalaiñ ïaka jingkam u Deputy CM u ma Sniawbhalang Dhar ba ki nong Jaiñtia ki kyrpad (requested) ïaka sorkar ban wanrah lynti rel (railway) hapoh Jaiñtia Hills, kane ka jingkam jong u Dy. CM ka pynlyngngoh shi katdei ïa ki nong Jaiñtia namar kam shym la don satia kum kata ka jingkwah, ïoh lehse don ki katto katne ngut kiba ïadon kti lang, kiba ïadei ïajan bha bad ki politicians ba long kum ki langïong, hynrei ka seng hi kan nym ailad ïakum kine ki kruiñ ki khwan myntoi.
Ka seng ka pynrem ruh ïaka jingkren u ma Sniawbhalang da kaba ong “ba hap donkam ban wan da ki briew ba nabar (we need outsiders) namar ka sorkar kan sa pynbiang ki kyndon ban tehlakam”.
Ka seng ka buh ïa u dak jingkylli? ba naduh mynno ka sorkar ka thaw ïa kita ki kyndon ki aiñ ban khang khyrdep na ka jingwan beaiñ ki bar jylla? La 3 snem tam lah pass ïaka resolution ban dawa ILP, hynrei aiu ka sorkar kala leh? Ka MRSSA kam shym lah treikam haduh mynta, aiu ka sorkar kala leh?
Ka seng ka sngew ruh ban buh jingkylli ba kata ka jingmyntoi na ka lynti rel balei ym wanrah shwa iaka jingmyntoi na ka bynta ki samla? Balei ym ai shwa ïa ka Government College? ha East Jaiñtia, balei haduh mynta dang sahteng ka Residential School, ka Teacher’s Training Centre? La buh jingkylli ka seng.
Ka seng ka pynkynmaw ruh ba haduh katno tylli kita ki cements plant ha East Jaiñtia ki ai jingmyntoi ia u paidbah ka thaiñ. Ka seng ka pynrem jur ïa ka sorkar ba haduh mynta ka bhah thungkam jong ki samla ha kito ki Cement plants kaba dei hok ban ïoh ki trai ri trai muluk kam shym lah urlong. Ka jingdawa ban ai reserve 80% ïa ki nongshong shnong ka thaiñ ym shym lah pyntreikam satia. Hato ka lynti rel kan ai jingmyntoi?
Khatduh khatwai ka seng ka phah da ka kyrwoh kaba shai ba “Klet shwa ïaka lynti Rel” phai shwa sha ki jingeh ki paidbah ki ïa mad na ka por sha ka por, phai shwa sha ki samla wad kam wad jam, phai shwa sha ki lynti ki synkieng kiba lah trei torti da ki contractors ba ïoh mon, phai shwa sha ka Civil Hospital kaba tang ka nam katba ki jingdonkam pat (facilities) ym don tang kawei. Pynkut ka kyrwoh na u Publicity Secretary ka JNC bah Mebanteilang Sukhlaiñ.