Ki sengbhalang kiba kynthup ïa ka JSU, FKJGP, KSU, HNFY bad ka RBYF mynta ka sngi ha ka por 3 baje janmiet kila pynlong ïa ka jingshong kyllaiñ Myngngor ha Lad Kiang Nangbah Govt. College Jowai bad hadien kane kila pynlong sa ka jingthang Mombati kum ka dak ban pynpaw ka jingsngewlem ia ki mynsiem bala khlad jong ki 5 ngut ki para doh para snam kiba la shah siat iap ha kti jong ki Pulit Assam ha shnong Mukroh West Jaiñtia Hills District ha ka 22 tarik mynta u bnai.
Ha kane ka sngi la wan ruh ban iasnohkti langa da kiwei de ki sengbhalang kiba kynthup ïa ka STIEH, APUF nalor kiwei kiwei de.
Kitei ki nongïalam seng bhalang ha ka jingkren kila pynrep jur ïa kane ka jingjia da kaba dawa jur na ka sorar ban kan kem noh mardor ïa kiba donkti siat ïap ïa ki 5 ngut bad ban pynshitom ïa ki katkum ki kyndon aiñ, la dawa ruh ïa ka sorkar ba kan pynbeit noh mardor ïa u pud u sam hapdeng ka jylla Assam bad Meghalaya bad ha ka juh ka por la dawa ban buh noh ïa ka Police Out Post ha shnong Mukroh lane ha Mukoilum.
La ioh ruh ka jingkren na u ma Erwin K. Sutnga uba la dawa ba ka sorkar jylla kala dei ban shimkhia ïa kane ka jingeh kaba ki paidbah ha ki thaiñ khappud ki ïa kynduh na ka por sha ka por la 50 snem mynta.
Ula kyntu ba jingïakhih kan dang ïaid shakhmat da ka jingïasnohkti lang jong baroh ki seng bhalang bad ki paidbah, shuh shuh ula pynsngew ba ïa ka mukotduma kaba yn sa ujor sha ka ïing bishar ha kaba ïadei bad kane ka jingpynbeit pud kala don haduh 600 page ha kaba dang ap sha ka jingsoi jong kito ki nongshong shnong kiba don ha khappud.
U ma G. Rymbai u President ba rim ka JSU ha ka jingkren ula ai jingmut ïa baroh kiba ïadon bynta lang ha kane ka jingthang Mombati ba ki MLA ki ban ïakhun sha ka ïing Dorbar thaw aiñ ka jylla ha kane snem ban wan ba kim dei ban file Nomination lada kim lad ban pynbeit ïa kane ka jingeh ban pynbeit ïa u pud u sam ba pura.
