Ka Hynniewtrep Youth Council (HYC) ha ka 25 tarik Rymphang 2026 ka la wan mih hakhmat jong ka ophis BJP ban pyrshah bad ban pynrem jur halor ka jingkren biej bad jingkren anna jong uwei na ki dkhot ka RSS bad dkhot ka BJP u Sunil Deodhar ban kren pynshit jaitbynriew lyngba ka niam.
Haba kren sha ki lad pathai khubor na ka liang u Rhembor Saiborne, General Secretary HYC u la ong ba bun ki paidbah ki la ioh sngew halor ka jingkren biej ka jingkren kaba bakla bad kiba sniew bad kiba ktah matīong ia ka jaitbynriew.
Nalor kata u la ong ba ka Seng ka pynrem halor ka jingkren jong u Sunil Deodhar bad ka Seng ka la thang ruh ia ka tynshop dur jong u hakhmat ka ophis BJP bad u la ong ba ka Seng kam donkam kum ia kine ki jaitbynriew ban wan ïuhkjat ha ka jaitbynriew namar ka jingdon kum kine ki jaitbynriew kan wanrah ia ka pait ka pra ka jingisih ka jingbym ia hun hapdeng ki para doh para snam.
U la ong ba ka Seng ka kwah ban pynsngewthuh ia ki paidbah ba uba nabar u sah uba nabar bad dei ki paradoh parasnam ki ban ia sah hangne bad ngi donkam ia ka jingiatylli bad ka jingsngewthuh jingmut ban nym ailad ia kine ki briew kiba pynsngewthuh bakla kiba ialeh ban ialam bakla bad khamtam eh ban pynrung ia ki jingmut ba sniew ha ki paradoh parasnam.
Ka Seng ka dawa ba une u Sunil Deodhar u dei ban panmap paidbah bad ym dei ban shu shong shu sngap jar namar kane ka la ktah ia ka jaitbynriew khamtam eh ia ka jingiatylli ka jaitbynriew.
Khatduh u la ong ba u Sunil Deodhar u la pyndonkam bakla ruh ia ka kyrteng u bah Rijoy namar u Bah Rijoy u dei u Riew Rangbah jong ka thain Riwar bad uba ka shnong ka thaw ka burom bha bad u dei ruh u Rangbah jong ka Seng Khasi bad ka Seng ka burom bha namar u la don bynta ha ka jingialeh ia ka Hills State bad une u Sunil Deodhar u la pyndonkam bakla ia ka kyrteng jong u Bah Rijoy bad kine ki briew kiba nabar ki wan ban ber bih bad ban pynsniew ia ka jingshongsuk shongsain ka jaitbynriew bad ban pynjot pynpra ia ka jingiaieid ki para doh para snam watla ka jaitbynriew ka don hapdeng ki jingngeit ha la ki jong ki niam kiba ki jaitbynriew ki ngeit.
Khatduh u la ong ka Seng ka buh ruh ia ka jingkylli ia ka BJP aiu kan leh halor ka jingkren une u dkhot ka BJP uba dei ruh u RSS uba la wanrah ban pynpait ia ka jaitbynriew.
