U Bah Lamphrang Blah MDC jong ka Mawphlang Diengiei konstitwensi uba dei ruh u Kyrtong jong ka NPP ha ka 31 tarik Kyllalyngkot 2025 u la wan thep kyrteng ialalde ha ISBT Mawïong ban ïakhun biang ia ka MDC Elekshon sha KHADC na Mawphlang Diengiei konstitwensi.
Kumban shu pynkynmaw u Bah Lamphrang Blah u la jop 4 sien ia ka MDC Elekshon bad u dei ruh u chairman ha KHADC bad ha ka kynti kaba mynta ka dei ka sien kaba 5 ba un ïakhun ia kane ka MDC Elekshon.
Haba kren sha ki lad pathai khubor na ka liang u Bah Lamphrang Blah u la ong watla u hap ïakhun pyrshah ia u MLA ka Mawphlang u Bah Mathew Beyondstar Kurbah hynrei na ka liang jong u Bah Lamphrang u la ong ki paidbah ki dang ieid bad u don jingkyrmen ba ki paidbah kin dang jied biang ia u kum uta u Nongmihkhmat kiba ki paidbah ki la pynjop donburom ia u la 4 sien lynter ha ka MDC Elekshon.
Ki kyrtong NPP kiba la wan thep kyrteng mynta ka sngi ki kynthup ia u Lamphrang Blah na Mawphlang Diengiei konstitwensi, u Bah Finest Kharkongor na Mylliem konstitwensi, u Bah Kordor Lyngdoh Nongkynrih na Mawkhar Pynthorumkhrah konstitwensi, u Bah Samlin Malngiang na Nongspung- Sohïong konstitwensi, u Bah Elias Kharbihkhiew na Sohrynkham Konstitwensi.
