U Rakkam A. Sangma, Myntri ba khmih ia ka tnad Pule Puthi ka jylla ha ka 10 tarik Ïaiong 2025, u la mih sha khmat ban jubab bad pynrem kylla ia kito kiba kynnoh ba ka kot iarap (guide book) CM Impact kam long kaba myntoi hynrei ka ban ktah kylla ia ki khynnah.
Ia kane, u Myntri u la jubab bad khyrwit kylla ruh ia u Nongïalam ka VPP Bah Ardent Miller Basaiawmoit uba la pynbor ia ka Sorkar ban pynduh noh ia katei ka kot iarap. U Sangma u la ong ba kumno ki briew kiba la nang la stad ki leh kum bym tip ei ei. Kumno ki briew kiba la shai ki pynshit ia ki bapli ki khynnah pule. U la kren siat ruh ia ka VPP da kaba ong “nga mynjur ia ka jingong ka VPP, lada kane ka kot iarap kam long kaba myntoi, bha ba thang noh”.
U Myntri u pynshai ruh da kaba ong ” ka CM Impact kam dei ka kot kaba la buh khnang ba dei ban pyndonkam beit baroh (mandatory) hynrei ia kiba sngewmyntoi ki lah ban pyndonkam. Lada phim sngewdonkam phi lah ruh ban bret noh sha wah Umiam ruh kam lei lei”.
U Myntri u la jubab ruh ia u Babu Kular Khongjirem uba la ong ba ka jingmih ka CM Impact kan ktah bad ap jingma ia ki khynnah pule. “kane kam dei na ka bynta jongno jongno hynrei na ka bynta ka jingjop jong ki khynnah pule bad ia kiba la tip lypa ym donkam shuh ba kin peit”, jubab u Myntri. U la ban jur ruh ba kane kan iarap khamtam ia ki skul ha nongkyndong namar ba kim ioh ia ka jinghikai ba paka bad ki nonghikai ruh kin pat biang lada ia nujor ha sor.
Nalor kata u la pynshai ba kane kadei ka thong bad ka jingangnud jong u Myntri Rangbah Conrad K. Sangma na ka bynta ban pynkylla ia ka Jylla sha ka jingbha ha baroh ki liang bad ka pule puthi ka dei kawei na ki mat ba u angnud.
U la ong ba na ka por sha ka por ka Sorkar ka wad ia ki lad ki lynti ban kyntiew ia ka pule puthi, kumta na ka bynta ka jingmyntoi ki khynnah skul, ka Sorkar ka la wanrah da kane ka kot, ong u Rakkam. U la iathuh ruh ba bun ki samla pule ki la ai ia ka jingiaroh ia ka Sorkar ba ka la wanrah da ka Kot lyngba ka NCERT namar tang kawei ka kot ka la myntoi lut ia baroh kiba pule ia ki syllabus bapher bapher.