Kawei na ki kynhun na East Jaiñtia Hills District ka la phah da ka jingthoh sha ka Expert Committee of the Reservation Policy, Government of Meghalaya na ka bynta ban dawa Reservation ba kyrpang ia ki nong Jaiñtia katkum ka bhah jong ka JHADC. Ia kane ka shithi la phah pynpoi mynta ka sngi lyngba ka ophis treikam jong u Deputy Commissioner jong ka East Jaiñtia Hills District u A. Baranwal, IAS.
Kane ka kynhun ka pynkynmaw ba kumba long mynta ka jylla Meghalaya ka don lai tylli ki kynhun jait bynriew kiba heh paid kiba kynthup ia ki Garo, ki Khasi bad ki Jaiñtia. Halor kane ruh la buh ia ki lai tylli ki District Council kiba kynthup ia ka Garo Hills Autonomous District Council (GHADC), ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC).
Halor kane ka nongrim kane ka kynhun ka sngewdei ba kum ki jait bynriew na ri lum Jaiñtia ruh ki dei ban ioh ka juh ka bhah ne ka hok kumba la ioh lem kiwei pat ki jait bynriew hapoh ka bhah thungkam thungjam bad wat ha ka bhah-pule puthi (Reservation).
Kila pynkynmaw ia ka Committee ba kumba long mynta ka jingaibhah kyrpang (Rerservation) hapoh ka jylla Meghalaya ka long kaba noh shiliang palat. Ki paid Garo kiba don ia ka GHADC ki ioh ia la ka jong ka bhah kyrpang, katba ki paid Khasi bad Jaiñtia wat la ki don la ki jong ki District Council, hynrei la mang bha kyrpang ia ki tang kawei kata Khasi&Jaiñtia, kane kala wan rah ka jingduhnong kaba khraw ia ki nong Jaiñtia.
Halor kine ki nongrim kane ka kynhun ka kyrpad ia ka Expert Committee jong ka sorkar Jylla ba ka dei ban ai bhah kyrpang (Reservation) noh la ka jong ia ki paid nong Jaiñtia kiba don hapoh ka JHADC.