Ka Khooid Ya Ka Wah Myntdu, kum shibynta ban ïaleh ban pynduh ïa ki pla Plastic bad hadien ba ka la lap ïa ka jingsyrtap jong ki Plastic ba bret khlem Akor jong ki nongshong shnong ha baroh ki sharing jong ki Pynthor ki ban tuid sha ka wah Myntdu bad kaba lah ban wanrah ka jingma ïa ka shnong Jowai.
Mynta ka sngi (12.03.2022) ka seng ka la khot ïa ka jingïalang bad ki nongrep kiba im sngi bad ka meirymaw ha ki Pynthor kba ki bynta ka shnong Ïalong, na ka bynta ban wad ki lad kumno ban pynneh, pynbha bad pynitynnat ïa ka wah Myntdu bad ki shnat jong ka na ka bynta ban dang pynim ïa ka rep bad ban ïoh um, ïoh lyer, ïoh khaw ka longbriew manbriew ka pateng ban dang wan.
Ha kane ka jingïalang la ïoh jingkren na u ma Snarmon Lato u nongshong shnong ba paw ka shnong Jowai, na u ma D. N Suchiang Genl. Secy bad na u ma Khroo L Pariat President ka Khooid Ya Ka Wah Myntdu, ha ka jingpyniaid jong u ma Bishar Shylla Vice President ka seng.
U ma P. Phawa President bad u ma D. Dhar Genl. Secy ka seng ki nongrep na Ïalong bad ka kong Sngi Dhar bad kiwei ki la kren bynniaw halor ka jingbym kyrshan ka sorkar jylla halor ka jingshah pynjulor ki lyngkha kba ha ka bor ka mariang myn ha u snem 2020 bad khamtam ka jingïarap kum ki Sboh, ki dawai mrad kim ju ïoh na ki tnat ka sorkar.
Ha kane ka jingïalang ki la shim ruh ïa ka Rai ban ïa trei ryngkat bad ka Khooid Ya Ka Wah Myntdu ha kane ka jingïaleh na ka bynta ban pynduh ïa ki ñiut Plastic bad ban dawa na ka sorkar jylla ban pynbha ïa ki nur bad ki tyllong um kiba tuid sha ka wah Myntdu, khnang ban im ka longbriew manbriew ha talawiar ka wah Myntdu. Ka seng ka kyrpad ïa baroh ki briew kiba shong ha tawiar ka wah Myntdu, ba kin sngewbha ban ym bret ïa ki niut ba pyut hapoh ki pla Plastic hynrei ban bret ïa ki niut ba pyut sha ki kper ha ki khiew syntiew ba kin kylla khyndew kylla sboh bad yn sa shngaiñ ka pateng. Namar kum kane ka akor ban bret niut ha ka pla Plastic kan sa wanrah ïa ka jingpang ba ma bad ka jingmynsaw ïa ka shnong ka dong ynda la wan u lapbah ha kine ki bnai ban wan bad ka um na ka wah Myntdu kan sa jaboh bad kiba pli ki nongrep kin sa duh khaw.
