Halor ka jingkhlad ka longkmie ba armet ha Maternal and Child Health Hospital (MCH) Jowai haka 4 tarik mynta u bnai, na ka liang u Deputy Commissioner ka West Jaiñtia Hills District u Abhinav Kumar Singh (IAS) ula pyntip bala dep ban thung ia ka Committee ka ban tohkit halor kane ka jingjia.
Kane ka Committee ka kynthup ïa ka kong B. Blah, MCS Addl DC, kum ka Chairman, ki dkhot (Members) ki kynthup ïa ka Dr. Patricia Shylla District & Medical Health Officer Jowai, Dr. Henry Lamare Paediatrician Civil Hospital, Khliehriat, bad Dr. Sofina Dkhar Gynecologist Civil Hospital Khliehriat.
Kane ka Committee kan tohkit naduh ka por ban pynrung hospital (admit) bad ka rukom ai jingsumar, kan lum jingtip katkum ka SOPs jong ki kyndon jingsumar, kan wat jingtip la ka don kano kano ka jingpynslem ne ka jingbym shimkhia na ka liang ki nongtrei katei ka Hospital.
Ha ka juh ka por yn leit tohkit kumjuh ïa kiba haïing ha sem jong ka longkmie ba khlad bad ki nongtrei ka Hospital, ban pyni ïa ki jingai jingmut bad ki lad ki lynti ban ïada ban lait na kum kine ki jingjia.
La bthah ruh ïa ka Committee ban pyndep ïa ka jingtohkit bad ban pynpoi ia ka kaiphod sha u DC haduh ka 9 tarik u Jylliew, 2025.
La btah ruh ba baroh ki ophisar naduh u Superintendent jong ka MCH hospital bad kiba don bynta baroh ba kin ai ka jingïatreilang kaba pura bad kane ka Committee da kaba ai ïa ki jingtip katkum ka jingdonkam jong ka Committee.