Wat la ia ka World Environment Day la dep ban rakhe naduh ka 5.06.2024 hynrei ka Sarot I Man ka dang bteng ia ka jingthung dieng ka jong ka haduh mynta.
Kumba kane ka group jong ki shiparalok na ka shnong Panaliar Jowai, ka lah dep ong ba, ym myntoi ban shu thung ia ki dieng, lada khlem da sumar ia ki. Kumta ha ka 07.07.2024 ka Sarot I man ka la leit pynkhuid ia ki tynrai dieng, kiba ka lah dep thung na ki snem ba myn shuwa.
Ha ka jingleit pynkhuid, ka la lap ba ki tynrai dieng ki lah heh la san da ka jingsumar ki dkhot, kiba la leit pynkhuid arsien ha ka shisnem. Ha kane ka juh ka step, lathung biang ia ki 20 tynrai ki dieng ha ka Kiang Nangbah Memorial Park, Treriat ka Kiang, Pynthorwah Panaliar, Jowai.
Ha shuwa ban thung ia ki dieng, ladon ka jingialang ba lyngkot kaba la pyniaid da u Ram Sumer, dkhot ka group bad la ai jingkren lyngkot da u Jait dao Sumer, dkhot ka group. Kum ka dak ban pan ia ka jingkyrkhu na ka Mei Ramew ba kan iada ia ka pyrthei ka mariang, la ai ia ka nguh ka dem da u Shape Paswet, dkhot ka group.
Ha ka jingkren jong u ma Jait dao Sumer, u la iathuh ba kane ka dei ka sien balai ba ka Sarot I Man ka pynlong ia ka jingthung dieng, da kaba ong ba la pynlong ia ka World Environment Day naduh u snem 1973, da ka jingiohi jngai ki riew shemphang ban iada ia ka mei mariang. U la ai nuksa ha ka shnong lajong, ha Jowai, shibun kiba la ktah ia ka jingpynjot ia ka mei mariang, khamtam ba mynta ladon jingthmu ruh wat ban pynduh ia u Lum Mooliksoo, u badei uwei na ki source ka lyer bad ka um, na ka bynta ki nongshong shnong.
Ka Sarot I Man ka ai khublei kyrpang ia u Eddy Murphy H. Passah uba la ai sngewbha ia ki tynrai dieng sha ka group khlem da shim kano kano ka jingsiew dor, la ai khublei ruh ia ka Jaiñtia Iasiat Khnam Memorial Society kaba lashah ia ka Group ban thung ia ki tynrai dieng ha ka jaka jong ka bad ha kajuh ka por ia ka shnong Panaliar ka ba dei ka nongpeit nongsumar ia ki jaka badei hapoh u pud u sam jong ka.
