-Haba ngi pom ia ki dieng ngi dei ban thung bujli: D.S.War-
Kii long kmie jong ka shnong Namdong-B ki ba don hapoh ka kynhun jong ka Village Organisation (VO) ki la mih paidbah mynta ka sngi mynta ka sngi ban rakhe ia ka World Environment Day da kaba ki pynlong iaka jingthung dieng kum ka dak ka jingpynneh pynsah ia ka mei mariang.
Ha kane ka sngi la synrang lang da u Waheh Shnong ka Namdong-B u ma D.S.War, Asst Waheh Shnong Pius Ksoo, Secretary Shnong ma A. Shadap.
Ha shwa ban sdang ia ka jingthung ia ki dieng la don ka jingialang kaba lyngkot, ba la pyniaid da ka kong Iris Lamare bad la ioh iaka jingkren na u Waheh shnong. Ha ka jingkren u la ai ka jingiaroh ia ki 2 tylli ki VO kiba don hapoh ka Shnong Namdong-B kiba tip kum ka VO Block-1 bad ka VO Block-2, kiba la shim ia ka jingkit khlieh ban rakhe ia ka sngi pynneh pynsah ia ki dieng ki siej kaba ngi tip ka World Environment Day. U la ong ba ngim dei ban pom pathar ia ki dieng namar na ki dieng ki siej ngi ioh ia ka lyer kaba khuid, bad na ki dieng ngi ioh ia ki tyllong um kiba sngur bad kiba shngiam.
Kumta haba ngi pom iaki dieng ngi dei ban thung bujli pat daki wei, khnang ba ka shnong kan ioh ia ka lyer kaba khuid bad ka mariang kan neh kan sah ha ka jingjyrngam bad ki lum ki wah kin nym tyrkhong. U ma War u la kyntu iaki long kmie ban sumar ia kine ki dieng ha dien ba ki lah dep ban thung khnang ba kin heh kin san kin lait na ka jingshah pynjulor.
Ha kane ka jingialang la ioh ruh ka jingkren ai khublei na i kong Rosa Ksoo, i la ai khublei ia ki para dkhot bad kum juh ia ki nongkitkam jong ka shnong kiba la ia mih ryntih ban iashim bynta ha kane ka sngi World Environment Day.
