Ka BJP ha ka 06 tarik Kyllalyngkot ka la thung da ki mandal President ha baroh 60 tylli ki Constituency jong ka Jylla ban pynkhlaiñ ia ka rukom treikam jong Seng BJP hapoh ka Jylla.
Haba kren sha ki lad pathai khubor na ka liang u State General Secretary ka BJP u Bah Wankitbok Pohshna u la ong ,”ban pynkhlaiñ ia ka bor jong ka ha kylleng ki 60 tylli ki konstitwensi ha Meghalaya, ka BJP ka la thung ia ki 60 ngut ki Mandal President. Kane ka jingpynbna ka long hadien ka jingjop jong ka jingïakhih dkhot kaba la sdang ha u bnai Lber jong u snem ba la dep, ha kaba ka seng ka la pynrung dkhot thymmai tang 60 hajar ngut tang hapoh ar bnai”.
Shuh shuh u la pynpaw ba kane ka sienjam ka long ban pynkhlaiñ ïa ka rukom treikam jong ka Seng BJP.
Ïa ka thup jong ki Mandal President ba la thung la pynbna da u Vice President u Bah Khrawboklang Basaiawmoit ha kane ka jingialang.
Haba ia dei bad ka elekshon District Council kaban sa long shen, ka BJP ka la pynthikna ban iashim bynta bad ka dang khot ia ki aplikeshon na ki kyrtong kiba kwah ban iakhun. U bah Basaiawmoit u la kdew ba watla ka party ka lah ban nym iakhun ia baroh ki seat hynrei ka don ka jingthmu ban pynieng kyrtong ha ki konstitwensi ba la jied kyrpang.
