Ka All Jaiñtia Muster Roll Workers & Labour Union (AJMRW&LU) CEC Jowai ha ryngkat ka jingïatreilang ka kynhun ‘Khooid Ya Ka Wah Myntdu’, ka Dorbar Shnong Mihmyntdu, ka Village Organisation Mihmyntdu bad ka ophis PHE (Electrical) kum shi bynta ban pynjyrngam biang ïaki bynta jong ka Wah Myntdu mynta ka sngi 5 tarik u Jymmang kaba dei ka sngi ‘World Environment Day’ kila pynlong daka jingthung ïaki tynrai dieng haki bynta ba dang shna ïaka jaka tan umbam jong ka Mihmyntdu Water Supply Scheme kaba don ha Wah Sahkti.
Ha shwa ban thung ïa ki tynrai dieng la don ka jingïalang ba lyngkot ha katei ka jaka bad la ïoh ruh ka jingkren na u President ka ‘Khooid Ya Ka Wah Myntdu’ ma Khroo L Pariat, kumjuh na u SDO jong ka PHE Electrical ma R. Challam kiba la pynpaw ka jingsngewkmen halor ka jingïashim bynta lang ban thung ïa kitei ki 40 tylli ki tynrai dieng.
Haka juh ka por la buh ka jingkyntu ba kum ki nongshnong shnong dei ban don ka jingkitkhlieh na ka bynta ka mariang bad ba ym dei ban bret pathar ïa ki ñiut kiba lah ban poi shaduh ki bynta ka Wah Myntdu, khnang ban ïoh ka lyer kaba khuid ban ring mynsiem.
U ma Pariat ula ong kumba long haduh mynta ngi la thung ïa ki dieng hadien katto katne snem kila heh la san bad kila shah pynjulor haka jingtei surok ne ki jingshna na ka bor ka sorkar ha kata ka jingsiew ïa ka bai khyndew ïa ki trai hynrei ka jingkitkhlieh bad ka pisa ban pynbha biang ïa ka Meirymew ym ju don koit, ka jingpynjulor ïa ki Khlaw bad ka wah Myntdu, ka dei ka nuksa.
Ula Pynshlur ïa ki khynnah skul ban thung ïa u dieng ban pynim ïa ki jingim ha ki snem ban wan, ym ba kito ki dieng kin long ki dieng thang ban shet ja ha ki skul.
Ïa kitei ki tynrai dieng 40 tylli la pynïoh lyngba tnad District Forest Officer (DFO) Social Forestry Division Jowai, na ka liang ka seng bad ka ophis u PHE kin ïai buddien ba kitei ki dieng bala dep thung kin ïoh lad ban heh ban san ha ki sngi ban wan.
