Ka Synjuk Ki Waheh Chnong Jowai mynta ka sngi 1 tarik u Jylliew kala pynlong ïa ka prokram thungdieng ha Ophis treikam u District Transport Officer (DTO) West Jaiñtia Hills kum shibynta ban rakhe kynmaw burom ïaka ‘World Environment Day’ ka ban long haka 5 tarik mynta u bnai.
Hashwa kane la don ka jingïalang bala pynïaid da u Embhah Lyngdoh, Vice-President SWCJ haka jingdonlang u ma Requoman Rq. Laloo, General Secretary SWCJ, la ïoh ruh ka jingkren shaphang ka jingdonkam ban thung ïaki dieng ban ïada ïa ka mei mariang da u Lamphrang Pohktai, Executive Member SWCJ, na u B. Japang, ACF-Social Forestry, Jowai Division, West Jaiñtia Hills District kumjuh na u Eborlang Lyngdoh, District Transport Officer, West Jaiñtia Hills uba la long kum u kongsan.
U ma Eborlang Lyngdoh haka jingkren kum u kongsan, ula pynsngew halor ka jinglah jong ki nongshong Shnong ka Ri Bhutan ban kynmaw burom bad ban kheiñkor ïaka mei mariang. Ula kyntu ruh kum ki nongshong shnong ki dei ban don ka jingkitkhlieh ban pynneh pynsah ïaka jingkhuid jingsuba jong ki Wah kiba don hapdeng jong ka shnong.
Ula kyntu ruh ïaki nongshong shnong ka sor Jowai, kiba don hajan jong ka ‘Wah Myntdu’ kaba bsa umbam umdih ïaki nongshong shnong, ba kin donkam ban wad ki lad ki lynti katkum ka juk ba mynta kumno ban pynneh pynsah ïaka jinglong khuid ka wah bad ïa ki sawdong sawkun ka mariang.
La pynkut ïa kane ka jingïalang da ki kyntien kitbok kitrwiang na u ma D.H. Pde, Treasurer Synjuk Waheh Chnong Jawai bad kala don ka jingthung ïaki tynrai dieng bala shim bynta da ki dkhot ka SWCJ bad ki nongtrei ka ophis DTO.
