-Da ki phewhajar tuid ki paidriewngeit sha ka jingpynkyntang Lyngdoh-niam sha Holy Spirit Parsish Sutnga–
Da ki phewhajar ngut ki paidriewngeit napoh ka Diocese Jowai, Nongstoin bad Archdiocese, ki para-Khristan na kiwei pat ki kynhun Balang bad na ka Niam-tre, ki la iatuid sha ka jingpynkyntang Lyngdoh-niam ia u Dn. Markferson Sympli bad ia u Dn. Santreki Muliar bad ka Proseshon Iukharist ha Holy Spirit Church, Sutnga Parish, East Jaintia Hills District, Jowai Diocese. Ia ka jinglehniam pynkyntang Lyngdohniam bad ka Jingknia Mas Iukharist la pyndep bad lamkhmat da u Most. Rev. Ferdinand Dkhar, dd, Bishop ka Jyllaniam Jowai ha ryngkat ki phewngut ki Lyngdohsohblei, kiba wan na kiwei pat ki Parish jong ka Diocese Nongstoin, Archdiocese Shillong bad na kiwei pat ki Diocese kiba marjan jong ka Diocese Jowai.
Ha ka por shiphew baje (10.00 AM) la pynlong ia ka jinglehniam pynkyntang Lyngdoh-niam (Lyngdohsohblei) la lamkhmat sha Duwan jingkñia da ka proseshon kaba lyngkot kaba la lamkhmat da ka jingruwai bad ka jingshadtynrai na ki khunsamla jong ka Balang Mookympat bad bud sa ka jinglehniam pynkyntang Lyngdoh bad ka jingkñia Mas Iukharist kaba la lamkhmat da u Bishop Ferdinand Dkhar kaba la synran da ki arngut ki Lyngdohsohblei thymmai kiba la pynkyntang (Sohblei u Markferson Sympli, Sohblei Santreki Muliar) bad kiwei de ki Lyngdohsohblei.
U Bishop Ferdinand Dkhar haba kren ha kane ka sngi, u ong hapoh ka Balang ka don ka jingkhot ha ki sap bapher bapher, kum ha ka kam pynkoit pynkhiah, ha ka kam hikai, ha ka kam synshar khadar, ha ka kam ialap ia ka Khubor babha bad kiwei de ki jingkhot. Kumjuh hapoh ka Balang ki don ki jingkhot ki bapher bapher bad ka jingkhot kaba kham kyrpang, ka jingkhot ban long ki Lyngdohniam (Lyngdohsohblei) ki ban tyrwa jingknia bad kiba sngap ia ka eh ka shon jong ki paidriewngeit ha ka jinglong mynsiem bad kiba im sngi ia ka Ktien ka jong U Blei bad ia ka jingpynbna ia ka Khubor babha jong U Jisu Khrist.
Ha ka sneng ka kraw ia ki Lyngdohsohblei ba kum ki Lyngdohsohblei, ki ia kynduh shibun ki jingeh ha ka jingim, hynrei im sngi ia ka ktien ka jong U Blei bad kan sa ialam ha ki kam Mission jong ki bad kiba dep hok iala ka jubanlak bad ka kamram jong ki. Kumjuh ha ka sneng ka kraw ia ki paidriewngeit, u Bishop Ferdinand u kyntu ban pule bad ban sngap ia ka Ktien ka jong U Blei bad ka Ktien ka jong U Blei kan pynjan ia ki sha U Blei bad ka jingsngew shipara bad ka jingiatylli hapoh ka Balang, ha ka Ri bad ha ka Jaitbynriew. Nangta u Bishop u ong haba u ne ka briew ki im da ka ktien ka jong U Blei ka pynkylla ia u ne ka briew na ka jinglong barim bad pynpura ialade sha ka jingim kaba thymmai bad u pynkut ia ka jingkren jong u da kaba ong “To ai ba ka jingshai ka ktien ka jong U Blei kan pyniatylli ia ngi kum kawei ka kynhun hapoh ka Balang bad ha kaba tei ia ka Ri India bad ia ka Jaitbynriew ka Bri U Hynniewtrep ba kan nangroi bad nangiaid shaphrang”.
Ha ka nohphai sngi la pynlong ia ka Proseshon Iukharist kaba lyngkot ha poh shnong (Sutnga) ha kaba baroh ki paidbah ki la iashim bynta ha kane ka proseshon bad kyntang iawai la pynkut da ka jingmane Sakrament bad ioh ka jingkyrkhu da ka Sakrament bakhiuid tam ka Duwan.
