Ka jingiaseng ialap kaba ar sngi (14-15/09/2024) jong ka Synjuk ki Seng Rangbah Katholik Jowai Diocese ka la long ha Annunciation Church Parish Namdong ha kaba la wan iashim bynta kumba shihajar arspah (1200) ngut ki Rangbah na ki 18 Parish jong ka Jowai Diocese ha kaba u Rev. Fr. Simeon Sungoh u long u kongsan ha baroh ki jinglehniam, hapoh ka jingpyniaid jong u President ka Synjuk Ki Seng Rangbah Katholik Jowai Diocese u ma Henry Manar.
Ha ka 14/09/2024, ha shwa ban sdang ia ka jingiaseng ialap kaba 19 jong ka Synjuk ha ka por 11:00 AM la don ka jingpynher ia ka Lama jong ka Synjuk da u Kongsan bud sa ka Anthem jong ka Synjuk nangta ka jingkren pdiang sngewbha da u President jong ka Namdong Parish, ka jingkren sneng kren kraw da u Rev. Fr. Dominic Kympat bad ka jingkren na u Kongsan bah Michael Lyngdoh.
Ha ka por 1:00 nohphaisngi hapoh ka jingpyniaid jong u ma Stalbinus Dkhar la phiah ia ki Rangbah ha ka kynhun kynhun ban leit jngoh ïingbriew bad iasyllok ia kito ki longïing ha ka khia ka shon jong ki bad ha ka por 4:30 PM la don ka jingialang bad iatai sani bha halor ka report jong ki kynhun leit jngoh ïing nangta bud sa ka jingiaseng miet ha kaba la ioh ia ka jingkren kaba sngewtynnat halor ka deiti jong u Rangbah da u ma Michael Nongtdu.
Ha ka 15-09-2024, hadien ka session kaba lyngkot ha ka por 10:00 AM la don ka jingknia Mass Iukharist bakhuid kaba la lamkhmat da u Sohblei Rev. Fr. Simeon Sungoh ha ryngkat ka jingiasynran lang ki Lyngdohsohblei jong ka Annunciation Parish Namdong bad kiwei ki Lyngdohsohblei kiba la wan na kiwei ki Parish jong ka Jowai Diocese.
U Rev.Fr. Simeon Sungoh uba long u kongsan, ha ka jingkren sneng kren kraw bad kyntu kynpham jong u ia ki Rangbah bad ia ki longkpa, u ong “Ko Rangbah to long ki Rangbah kiba kat ki Rangbah da shisha kiba tei ia ka ïing ka sem, ia ka Balang, ia ka imlang ka sahlang bad ia ka jaitbynriew ba kan nangkiew shaphrang bad ban bha ban miat ka longbriew man briew. Nangta u ong, haba ong Rangbah, ka thew ia u Rangbah uba imbha im miat ha ka hok kat kum ka hukum, uba kit uba bah ia ka khia ka shon jong ka ïing ka sem, ka Balang bad uba tei ia ka bha ka miat jong ka imlang ka sahlang ban bha ban miat ka longbriew manbriew”.
Katba ha ka nohphaisngi pat la ioh ia ka jingkren kyntu kynpham ia ki Rangbah bad ia baroh ki paidriewngeit kiba la ia wan sakhilang ia kane ka jingiasengialap kaba 19 jong ka Synjuk ki Seng Rangbah da u bah Telesphore Shangpliang bad pynkut ia kane ka sngi da ka jingkyrkhu da ka Sakrament bakhuid tam jong ka Duwan.
