Ka All India Football Federation (AIFF) kaba dei ruh ka shlem treikam bad kaba pyniaid ia ka lympung I-League ha India baroh kawei ka la ailad ban pynlong ia ka jingialehkai sdang na ka bynta ka Shillong Lajong ha la ïing (home game) ha ka janmiet ka 24 Naiwieng ha kaba ki la sdang da ka jingiakhun pyrshah ia ka Churchill Brothers ha madan SSA stadium Polo Shillong.
Ha kane ka samoi, ka Lajong ka la pynkhreh bha na ka bynta kane ka aiom 2024-25 namar ha kane ka samoi ba lah dep, ka Lajong ka la pynkut ia ka jingialehkai da kaba don ha ka kyrdan ba 7. Kumta ban pynbha shuh shuh ia ka jingialehkai, kane ka klob ka la wanrah shuh shuh ia ki snar ïalehkai na shabar Ri na ka bynta ka thong kaba kham shajrong.
Hadien bun bnai, ki paidbah kiba la ap khmih lynti na ka bynta kane ka lympung bad mynta, ka jingkhmih lynti ka la pynhun hun bad pynkmen namar ki la ioh ban sakhi ia la ka klob kaba ki ieid bad kyrshan radbah. La sakhi ia ka jingtuid ki paidbah ryngkat ka jingsawa kawei ka sur, kata ban pyrta ia ka kyrteng ‘Shillong Lajong’. Kawei na ka jingmyntoi ka long ba ka Lajong ka la ioh ban ïalehkai ha kane ka madan hadien ba la ioh ban pynheh ia ki jaka shong (capacity) mynta u snem.
Haba phai sha ka jingialehkai mynta ka sngi, ka Churchill Brothers ka la sdang ban ñion naduh ka kylla step bad la sakhi ba ki rangialehkai ka Lajong ki dang klumar bha bad ka jaka ba ki don (position) ka khlem long Ryntih kumba la pyniaid da u coach. Tang ha ka minit ba 14, ka Churchill ka la ioh ban thep shi kol lyngba u W.Lekay bad hadien katei ka kol, ki rangialehkai ka Churchill ki la iai shim kabu bad tang hadien 7 minit ba la thep ia ka kol nyngkong ki la ioh biang sa shi kol da ujuh u rangialehkai (Lekay).
Wat hadien kitei ki 2 kol ba la shah thep, ka Lajong ka khlem kynran dien bad ki nongkyrshan ruh ki khlem sangeh ban ai mynsiem. Lyngba ka jingiakhun kaba tyngeh ka Lajong ka la ioh ban pynphai shi kol ha ka kylla step lyngba u D.Tardin , kata ha ka minit ba 35.
Haba bteng pat ka kylla miet, ka Lajong ka la sdang ban shim kabu kylla bad khlem da ailad ia ki rangialehkai ‘dien ka Churchill, ki la ioh ban thep sa shi kol lyngba u Renan Paulino ha ka minit ba 50. Haduh ban da kut ka minit ialehkai, baroh 2 kynhun ki khlem ioh shuh ban thep kol watla ka Jingiakhun ka la kham noh shiliang lyngba ki 2 kol na ka Lajong.
Ka jingiakhun ha ka sngi sdang jong kane ka lympung ka la kut noh da 2-2 bad la hap ban iasam mar 1poiñ.
Ka Lajong kan bteng biang ia ka jingiakhun ha la ïing pyrshah ia ka Dempo ha ka 30 Tarik mynta u bnai ha ka por 7 baje janmiet ha kajuh ka madan.