Da ki spah ngut ki paidriewngeit jong ka Balang Katholik napoh ka Parish Jowai bad nabar ki la iatuid hynne ka sngi 23/06/24 sha ka sngi burom ka Dohnud bakhuid tam u Jisu ha Mihmyntdu, West Jaiñtia Hills bad la nangpynkhraw shuh shuh ia kane ka sngi ha kaba da ki phew ngut ki Heprit (shynrang bad kynthei) ki la iohpdiang ia ka Communion ba nyngkong jong ki.
Ha ka por 10 baje mynstep la don ka jingknia Mass bakhuid, ha kaba u Rev. Fr. Hilarius Lamare, Parish Priest ka Jowai Parish u long u Nongknia Rangbah ha ka jingiadonlang u Rev. Fr.Simeon Sungoh bad u Rev. Fr. Laurence Paswet phadar synrop ka Jowai Parish.
U Rev. Fr. Hilarius Lamare haba kren ha kane ka sngi u ong haba ngi pynlong ia kane ka sngi burom jong ka Dohnud bakhuid tam U Jisu ka long ka sngi ha kaba ngi pynthymmai ialade ban long ki Nongbud ba shisha jong u bad ban bud ia ki jinghikai jong u, naba u Jisu u long uba sngewrit, uba jemnud, uba dap da ka jingisnei bad ka jingieid ia ki briew baroh.
Haba phai sha ki Heprit kiba iohpdiang ha ka jingim jong ki ia ka Communion ba nyngkong, u kyntu ia ki ban long kiba tista ban wan sha ki jinglehniam bad ban pdiang borabor ia ka Communion bakhuid ha ka jingim jong ki.
Ha ka nohphai sngi la nangioh shuh ia ka jingkren kaba sngewtynnat shaphang ka Dohnud bakhuid tam jong u Jisu da u bah Fridian Marbaniang, na ka Parish Mawlai Archdiocese Shillong bad pynkut ia kane ka sngi da ka jingkyrkhu da ka Sakrament bakhuid tam ka Duwan.
[U bah Fridian Marbaniang katba u dang ai jingkren sha ki paid riewngeit ha Mihmyntdu]
[Ki khynnah pdiang communion ba nyngkong ki dang ai ka jingrwai sngewnguh]