Mynta ka Sngi ka 11 tarik u June 2025 ka Jaiñtia National Council JNC lyngba ka Employment Commission jong ka, kaba long kawei naki shnat treikam ka seng ban peitngor iaka jingkyrduh kam kyrduh jam jong ki khun samla, kala leit ban iakynduh markhmat bad u manager kawei ka petrol pump ka Indian oil kaba Don haka shnong Mookhep, lad Jalyiah, East Jaiñtia hills, ban dawa thungkam iaki khun samla trai ri hakane ka pump khnang ban myntoi ki trai ri trai muluk haba don kum kine ki jait business kiba lah ban ai kam ai jam.
Ka seng hapoh ka Jingialam u bah Nangjan Dkhar Vice President ka JNC CEC ryngkat bad ki nongialam shnong ka Shnong Mookhep u Ma V. Siangshai kila iakren bad utei u manager u M.Rathore bad haka jingiakren bad u, u la kular ban shimkhia halor katei ka kam bad ban leh ruh ia kaba donkam kata ban thung ia arngut ki nongtrei ha une u bnai ban wan kata naduh ka shi tarik, bad u la ong ruh ba ka pump jong ki ka long kaba kloi ban iatreilang bad ka seng khamtam ruh bad ka Shnong naka bynta ki kam babha.
Naka liang Jong ka seng kala ong ba hakane ka pyrthei duh kam duh jam khamtam iaki khun Jong ka Shnong katno tam ka pyndap iangi daka jingsngewdiaw, te lada kino kino ki jait business kum ki pump, ki kharkhana baheh ne barit ne kino kino ki kloi ban kyrshan iaki khun samla katno tam kan long ka jingkyrkhu bah iaka shnong bad iaka thaiñ hi baroh kawei, te lada kine kim lah ban ai ka jingkyrshan ka jong ki katno tam kan long ka jingsngewsih, bad ka buh ruh ka jingkylli myntoi aiu bakin don.
Khatduh ka seng kala ong ruh bakan sa buddien iakane lada ka long ne em kumba la kular.
