Ka Jaiñtia National Council (JNC) lyngba ka Employment Commission jong ka kum shi bynta ka jingpyntreikam ia ka Save Jaiñtia Mission kaba la sdang (launch) ha ka 14 Tarik December 2024 mynta ka Sngi ka 2 Tarik kala hiar sha kawei na ki karkhana dewbilat kata ka Amrit Cement ban khynra labour licence bad trading licence ia ki briew kiba nabar jylla.
Hakane ka jingleit khynra ka Commission kaba la ialam khmat da i bah Ency Shadap Chairman ka Employment Commission bad i bah Mebanteilang Sukhlaiñ Secretary ka Commission ryngkat ka jingiasynran lang ki nongialam ka CEC kala sdang shwa na Amrit Cement ban khynra ia ki kot ki sla jong ki briew kiba nabar jylla bad ha kane ka jingkhynra la lap ba da ki phew phew ngut ki bym don ia ki kot ki sla ba biang bad kumta ka Commission da kawei ka sur ka la beh ia ki mardor bad la maham ruh ia ki company ba kim dei satia ban wanlam briew nabar khlem ki kot ki sla kiba biang bad ba ym dei ruh ban thung ia ki nongtrei katba ki briew ki jong ngi ki dang lah ban trei khamtam ha ka kam labour.
Kane ka jingkhynra ka seng ka long shibynta ban dawa pyntreikam noh ia ka mat kaba ka seng kala buh hapoh ka Save Jaiñtia Mission kata ban shna noh da ki policy kiba thymmai halor ka thungkam thungjam khamtam ha ki kyrdan kiba ki briew jong ngi ki dang lah ban trei.
Haba ai jingkren u General Secretary JNC-CEC bah Wanshwa Suting u la ong ba ia ki bym biang ki kot ki sla dei ban beh noh mar mar bad ym dei ruh ban wanrah briew nabar katba ki briew trai jaka trai puta, ki dang lah ban trei ia ka kam bad u la ong shuh ba ka seng kan nym shong kli kti katba ka jingdawa jong ka kam pat seisoh bad kan sa leit ruh sha kiwei pat ki kharkhana ban leh ia ka juh.
