Ki dkhot jong ka Khasi Student Union (KSU) ha ka 11 tarik Lber ki la mih kynsan ban tur sha Assembly halor ka jingthmu ka sorkar ban wanrah ia Meghalaya State Investment Promotion Facilitation Act (MSIPF) hapoh ka Ïingdorbar jong ka mang tyngka bad kumjuh ban pyrshah ia ka lynti Rel.
Ha kane ka sngi ba tur ki dkhot ka KSU la ialam ia ka kynhun da u President Rangbah jong ka Seng u Bah Lambokstar Marngar, u General Secretary ka KSU Sengkmie Donald V Thabah bad ki dkhot nongkitkam jong ka Sengkmie bad na kiwei kiwei ki circle.
Na ka liang u President haba ai jingkren ha kane ka sngi u la ong ban iada ia ka khyndew ka shyiap ka dei ka kamram jong ka sorkar bad u la ong ruh na ka liang ka Seng kam kwah ia kano kano ka aiñ kaba ban lilam ia ka Jaitbynriew, ha jaka ban thaw ia ki aiñ iada, ki thaw pynban da ki aiñ ban lilam ia ka khyndew ka shyiap ruh.
Shuh shuh u la bynrap ka jingkylli kaba mih ngi khmih lynti ia ki nongthaw aiñ ban kyntiew ia ka Jaitbynriew ne ban pynjot ia ka Jaitbynriew.
Na ka liang ka Seng ka phah da ka kyrwoh kaba shai sha ka sorkar bad sha baroh ki nongthaw aiñ ba ki paidbah ki la pynkup bor ia ki ym dei ban lehkai ia ka lawei jong ka Jaitbynriew bad ka kyrwoh kaba shai sha baroh ki nongmihkhmat wat lehkai bad ka Jaitbynriew.
U la bynrap sangeh ka kwah shong rel, ia kito ki nongmihkhmat kiba kwah shong rel, hynrei pyntreikam shwa ia ka ILP, ka aiñ ban iada ia ka Jaitbynriew sa ia peit ia ka lynti rel.
Ka jingthmu jong ka sorkar ka long ban pynsngewbha tang ia ki briew kiba na shabar ym ia ki paidbah ka Jylla.
