Kawei ka trok kit dew bilat 12 shaka, kala leit tynrah ia ki kynroh ïing shi lynter kiba don hajan iawthymme, Ladthalaboh, Jowai bad hadien kane ka la kylla khongpong bad kem ding artad.
Ha kane ka jingkemding ki bynta ba shakhmat jong kane ka trok kila julor khaid. Katkum ka jingiathuh jong ki marjan ïing kiba la iohsngew ia kane ka jingjia, kila ong ba kane kala jia ha ka por kumba 2:30 ei ei mynta ka step phyrngap. La suba ba kane ka jingjia ka lah ban dei na ka jingshoh samthiah jong u nongñiah.
La iathuh ruh ba ha kane ka jingjia u nongñiah bym pat lah ban ioh kyrteng, u la mynsaw na ki bynta jong ka khlieh bad la pynkit ia u sha ki jaka sumar.
Ha kane ka jingjia ar tylli ki kali rit ba kynthup ia kawei ka Bolero bad ka Alto kila julor malu mala. Kane ka Bolero ka dei kaba pynieng hapoh ka compound kala julor namar ka jingban jong ki maw kynroh, katba katei ka Alto kaba pynieng hajan ka jaka ba kylla katei ka trok, kala julor da ka jingkem ding ha ki bynta ba shakhmat da ka jingpur jong ka ding na katei ka trok.
Ia katei ka trok ym pat ioh number satia haduh ba thoh ia ka khubor, namar ki number plate ba shakhmat kila ingkhong katba kiba shadien pat kila shah tap da ka cement.
Katkum ka jingiathuh jong ki katto katne la ong ba u trai jong kane ka trok udei na ka shnong Pasyih, hynrei ym pat lah ban pynshisha. Ki Pulit jong ka Jowai PS kila wan ban khyllie bad tan ia kane ka trok ha ka por 8:00 baje mynstep, bad kila shimti ia ka case bad ka jingtohkit ka dang iaid shaphrang.
