Ka jingïalehkai phutbol na ka bynta ki khynnah shynrang bad kynthei kaba la tip kum ka “Chief Minister U-12 Open Football Tournament 2023”, ba la pynlong da ka ophis jong u District Sports Officer, West Jaiñtia Hills District, Jowai na ka bynta ka Laskeiñ Block kala poi noh sha ka jingïakhun phainal mynta ka sngi.
Ha kane ka jingïakhun phainal ha ka liang ki khynnah kynthei ka St. Dominic Higher Secondary School kala lah ban pynliem da 4-0 kol ïa ka Winter Adventist Secondary School Mowkaiaw. Katba ha ka liang ki shynrang ka Laskeiñ Social Cultural & Sports Club kala pynliem da 3-0 kol da ka jingïashut Tie Breaker pyrshah ïa ka kynhun ïalehkai jong ka St. Dominic Higher Secondary School.
Ïa ki khusam sha ki nongjop la sam da u kongsan jong kane ka sngi u ma Bisonroy Iano, President Laskeiñ Block Area Sports Association, ha ka jingdonlang u DSO ma K. Passah, u Head Master Laskeiñ Govt. L.P School ma Rangbah Suchiang, ki nonghikai nalor kiwei kiwei de.
La ïathuh ha kane ka lympung “Chief Minister U-12 Open Football Tournament 2023” kiba jop na ki Block Level kin ïoh mihkhmat sha ka District Level bad kiba jop na ka District Level kin leit ban mihkhmat sha ka State Level.
