Ki san ngut ki MLA ka Trinamool Congress (TMC) ha ryngkat ka jingkyrshan u MLA ka Congress, u Bah Ronnie Lyngdoh ki la leit ban pynkhreh na ka bynta ban bat ia ka kyrdan jong u nongialam ka liang pyrshah bad u Opposition Chief Whip.
Haba kren bad u Lamphang ka Ïingdorbar, u Thomas Sangma u la ong “Ki 6 ngut ki MLA ki ba kynthup ia ki 5 ngut na TMC bad uwei na Congress ki la tyrwa ia u Dr Mukul Sangma ba un long kum u nongialam ka liang pyrshah bad ia u Bah Ronnie V Lyngdoh kum u opposition chief whip”.
U la bynrap ruh da kaba ong “Mynta ka sngi, ki la wan ha ka kamra jong nga bad ngan sa bishar ia kane ka jingtyrwa bad ngan sa ai ka rai”.
U Lamphang u la ong ruh ba ka kynhun jong u Dr Mukul ka la long ka ba biang ha ka jingdon briew hapoh ïingdorbar ban don dkhot 6 na ka 10 ngut.