Ka KSU Mawlai Circle ryngkat ka FKJGP bad HNYF Mawlai Circle ka la pynlong ia ka Prokram wah Lama iong mynta ka step jong ka 13 tarik u Nailar 2024.
Ia kane ka program la sdang ban wah ia ki lama iong na Mawlai Petrol Pump, ha kaba la wah ia ki kali kamai, kali shimet kynthup ruh ia ki arshaka ki ba iaid ha kylleng jong ka Mawlai bad la wah ruh ia ki plakad, kum ka dak ban kymmaw burom ia ka lyngkhuh sngi iap ka ba lai snem jong ka jingshah pyniap dusmon ia u bah Cheristerfield Thangkhiew.
La sakhi ruh ba Hadien ba kitei ki lai seng ki la wan ban wah ia ki Lama ha shilynter ka surok ha Mawlai Petrol pump ki Pulit ki ba pyniaid kali ha katei ka surok ki la phet rieh noh bad hadien ba ki lai seng ki la leit noh sa sha kiwei pat ki jaka ki pulit ki la wan biang ban pyniaid ia ki kali.
Ha ba kren sha ki lad pathai khubor u Biangbor Paliar ba dei u President ka KSU Mawlai Circle u la ong, ba ka jingpynlong ia kane ka jingwah Lama iong ka long ban pynpaw sha ka pyrthei ba ngim pat shem la klet ia jingshah pyniap dusmon u bah Cheris hynrei ki dang kynmaw wat haduh mynta ruh.
Ka jingshah shim jubor ia ka mynsiem u bah Cherish kum ka shnong Mawlai bad ka jaitbynriew hi baroh kawei ka pynpaw ka jingsngewsih jur, namar haduh mynta ym pat shym la ioh ia ka jingbishar ka ba hok.
U la ong ruh, ba ngi sngewthuh ba kane ka kam ka dangdon hapdeng ka jingbishar hynrei kum ka jaitbynriew baroh kawei ki kwah ia ka jingbishar hok bad kim kwah shuh ba kum kane ka jingjia kan wan jia biang ha ka bri u hynniewtrep.
Kum ban shupynkynmaw hangne, ba ka jingshah siat iap u bah Charisterfield Thngkhiew kadei ka ba la jia ha ka 13 tarik u Nailar 2021, ha ka ba ki pulit ki la wan shiteng miet ban shim ia ka jingim u bah Cheris u ba don hapdeng ka met ka bym shait bym khlaiñ.
