U Dr. Sukanta Majumdar Myntri Khynnah ka Sorkar pdeng ba peit ia ka tnad pule puthi bad ka tnad DoNER ha ka 26 tarik Rymphang 2025 u la lum ia ka jingialang ban peit bniah halor ki project ba la pyntrei ha ka Jylla Meghalaya.
Haba kren bad ki lad pathai khubor hadien ka jingiakynduh bad ki ophisar na ki tnat bapher bapher jong ka jylla, u la ong ba ki la peit bniah halor bun tylli ki project kiba dei hapoh ka tnat DoNER bad hapoh ka jingialam jong u Myntri Rangbah duh ka ri u Narendra Modi bad hapoh ka jingpeit jong u Myntri ba dei peit ia ka tnat DoNER u Jyotiraditya M Scindia.
Shuh shuh u la ong ka sorkar Meghalaya ka dei ban ithuh ia ki Shnong ha ki khappud na ka bynta ki kam pynroi. Ka sorkar Meghalaya ka dei ban pyndep noh ia kine ki project kiba dang sah kut khlem pyndep , ki don kumba 10 tylli ki project kiba dang sah, ha kaba ka sorkar Meghalaya ka la trei shitom bad thrang ban pyndep noh ia kine ki project ha ka por kaba biang.
U ong dang shen ka sorkar Meghalaya ka la pynbeit haba ia dei bad ki kam ba hap hapoh ka tnat Industries hynrei dang shen ki la pynrung hapoh ka Industry category. Hadien ba ki la wanrah hapoh ka Industry ka logistics ha ka jylla kan dang kiew bad kan kyntiew ruh ia ka ïoh kam ïoh jam bad kumjuh ruh ha ka tnat jngohkai bad kiwei de.
U Dr. Sukanta Majumdar u la ong ba ka sorkar Meghalaya ka thrang ban kyntiew ia ka kam jngohkai pyrthei ha ka jylla bad u don ka jingkyrmen ba ha kine ki snem ba thymmai ka jylla kan kiew ha kane ka kam.
Shuh shuh u la ong u Myntri Rangbah duh ka ri u Narendra Modi u don ka thong ban kyntiew ia ka ri ha ka ïoh ka kot ha u snem 2047 bad u la ong ruh ka Meghalaya kan pynkhreh ia ka Mission Document ban kyntiew ia ka Jylla.