Ka Khasi Students’ Union (KSU), Ranikor Circle, ka la buh jingkylli haba iadei bad ka jingithuh nongshong shnong India, kynthup ia ka jingioh Electoral Photo Identity Card (EPIC), u Rana Ahmed u Nongkhaii droks na Bangladesh.
Haba kren sha ki lad pathai khubor u President ka KSU Ranikor Circle u bah Marconi Thongni u la kynnoh ba u Rana Ahmed uba dei u trai jong ka Hotel City Palace kaba don ha Lapalang—ha kaba ka kynhun Anti-Narcotics Task Force (ANTF) dang shen ka la ïoh ban kurup ïa ki dawai Yaba bad u dei ruh u Nongkhaii drok na Bangladesh.
U bah Marconi Thongni u la pyntip ba u Rana Ahmed, ula shongkurim ia kawei ka kynthei Garo na ka shnong Rajapara, hajan khappud, u donkti ha ka jingkhaïi drok bad mynshwa ruh u la shah kem ha Kolkata ha kaba iadei bad ka jingkhaïi drok.
Haba pynpaw ïa ka jingkyndit, ka KSU Ranikor Cirlce ka sngewkhia jur ba wat hapdeng ka jingkynnoh ba u dei u nongwei, hynrei la ïathuh ba u Ahmed u la ïoh ïa ki kot ki sla ba thikna, kynthup ïa ka EPIC, na ka ophis jong u Deputy Commissioner, South West Khasi Hills District.
Ka KSU ka la dawa na ki bor ba dei peit ban shim khia mardor ban pynthikna ba ki bar jylla kim dei ban shim kabu ban ioh ia ki kot ki sla kiba long aiñ bad ban leh ia ki kam beaiñ ha ka jylla.
