Kiba haïing jong ka longkmie ba armet kaba la khlad noh ha MCH, Jowai ïa kaba la tip kyrteng kum ka Pynchei Bareh, mynta ka sngi 5 tarik u Jylliew kila ujor da ka ejahar ha Jowai Police Station halor kane ka jingjia ba sngewsih kaba la jia hynnin ka sngi.
La ïathuh ka jingleit ujor ïa kane ka Ejahar (FIR) ka dei halor ka jingbym shimkhia jong ki nongtrei jong katei ka Maternal and Child Health (MCH) Hospital Panaliar, Jowai.
Katkum ka Ejahar la ïathuh hadien bala phah pynkit ïa ka Pynchei Bareh sha Maternal and Child Health Hospital, Panaliar, Jowai la ieh sah ïa ka khlem ka jingsumar kaba biang. Ki nongtrei jong ka hospital ki la pyntip ïa ka ba yn pynlong ïa ka jingsumar bad ki la ai jingmut ïa ka ba kan nym bam jingbam, hynrei la ieh sah khlem ai jingsumar watla ka don ha ka jingpang kaba jur bha.
Naka liang ka kong Pynchei Bareh kala hap ban bam ja ha ka por 1:00 PM ha ka 04.06.2025 namar ka jingbym shai halor ka jingsumar jong ka, kumta ha ka por kumba 5:00 PM eiei, ka la mad ïa ka jingmih snam kaba jur bha bad ka la pyntip ïa ka juh sha ki nongtrei jong ka hospital, hynrei ym shym la leh eiei. Hadien kata, ka la khlad noh na ka jingpang jong ka ha ka por kumba 9:30 PM ha kane ka juh ka sngi.
Na ka liang ki pulit kila leit shimti ïa ka metiap mynta ka sngi bad la pynkit sha Ialong Civil Hospital ban leh ïa kaba donkam.
Kumta na ka liang jong kiba haïing kila kyrpad ia ki bor Pulit ba kin shimkhia mardor ïa kane ka kam da kaba pynlong ïa ka jingtohkit pyrshah ïa katei ka Hospital bad la kyrpad ban pynïoh ïa ka hok jong katei ka longkmie ba la khlad noh.