Ka FKJGP-Khliehriat Circle mynta ka sngi ha ryngkat ka jingsynranlang samla Deihok Sumer uba dei u President ka FKJGP-East Jaiñtia Hills bad katto katne ki Nongïalam ka seng, kila leit kynduh ïa u SP ka East Jaiñtia Hills ban buddien biang ïa kawei ka Complaint haba ïadei pyrshah ïa u wei u Pulit SI Officer uba ka seng kam kwah ban pynpaw kyrteng.
Ki daw ba ka seng ka ujor ïa utei u Pulit SI kadei hadien bala don ki Dkhot ka seng bala leit buh ïa kawei ka FIR ha kine ki khyndiat sngi baladep ha Thanad Ladrymbai Police Outpost halor kawei ka jingjia shah tuh hadien baki Dkhot ka seng kila dep thoh ïaka FIR daka ktien Khasi utei u heh Pulit pat ula btah ïa ki nong ujor ban thoh da ka ktien Phareng.
“Ynda la kylli da ki nong ujor balei kumta Sir namar baroh shi katta la thoh da ka Ktien Khasi ruh ka biang mynta pat balei phim shah sa kawei ruh para Khasi phi lah ban sngewthuh” la ong ki nong ujor, utei u ophisar ula pynphai da kaba ong mynshwa ki shah mynta pat ka Court kala khang bad dei ban thoh tang daka ktien Phareng (English).
Haka jingïakren ka seng bad u SP ula kren shai ha khmat ki Nongïalam ka seng ba kam don kum kata ka jingbtah ban thoh ïaka FIR tang daka ktien Phareng, u SP ula ong ïa ka FIR lah ban thoh da ka Ktien Khasi, Pnar, Garo, Hindi bad kadei ka kamram jong ki Pulit ban Translate pat ïaka FIR sha ka Ktien Phareng.
Na ka liang u SP ula kular ruh ban phah tohkit ïa katei ka jingjia khnang ba kan ym jia shuh nangne shakhmat bad ynda la dep tohkit u SP un phah lang ïaka report sha ka seng ruh katkum ka jingong jong u. Ka seng ka ai khublei ïa une u SP ka East Jaiñtia halor ka jingshimkhia jong u ïaki jingeh ki Paidbah namar ba kidon bun ki bym tip ne sngewthuh ïaka Ktien Phareng bad ki paidbah ki khamsuk ban thoh da ka Ktien Khasi namar ba kadei ka Ktien lajong bad khadduh ka seng ka buh ka jingkyrpad ïa baroh ki Pulit ba kum kine ki jingjia kim dei shuh ban jia nangne Shakhmat.
Ka seng ka maham lada dang lap kum kine kan sa leh da kaba tyngeh, pynkut ka kyrwoh na u President ka Seng FKJGP-Khliehriat Circle u bah Michal Chyrmang.