Ka seng All Hynniewtrep People United Front (AHPUF), kala pynpaw ka jingpyrshah ia ka jingthmu jong ka ‘Chi ïung Multipurpose Society’ ban pynkhalai biang ia ka First Prize jong ka Lucky Draw jong ki halor ki nongrim bapher bapher.
Ki nongialam jong ka seng ki ba kynthup ia u President John Phawa bad u Secretary W. Langwar, ki la ong ba ki Chi ïung ki la dep pynkhalai ia ka first prize jong ka lucky Draw jong ki ha ka 28.09.2024, ha kaba ki la pynbna ia ka result jong ka first prize kaba dei u number ‘316592’. Kumta da ki phew hajar ngut ki paidbah ki la bret ia ki tickets jong ki namar ba ki la pynbna ia ka number ba pom. Katba ha ka step jong ka 29.09.2024, ka Chi ïung Multipurpose Society, ka la pynbna ba ka don ka jingleh thok ha ka jingpynkhalai ia ka first prize. Kat kum ba ki la pynbna ha ki Social Media bad YouTube channel.
Kat kum ka jingphla jong ki khynnah ha ki lad pathai khubor ki ong ba ki buhrieh ia ka ticket ha pohkjat, ka ia pher na ka jingong jong ka Chi ïung ba ki ong ba don dien ktha bniat, ka mut ba ki buhrieh ha poh ktien.
Ka Chi ïung Multipurpose Society ka pynbna ban pynkhalai biang ia ka first prize khlem da pyrkhat pat ia kito ki phew hajar ngut ki ba lah bret tickets, namar ba ki la pynbna ia u number ba pom ha ka 28.09.2024. Ka seng ka la dep buh jingthoh ruh ha ka 07.10.2024 ha Jowai Police Station halor kane ka kynrum kynram jong ka Lucky draw jong ka Chi ïung Multipurpose Society.
Na ka liang ka Seng AHPUF ka la dep ia kynduh ia ka Team Chi ïung Multipurpose Society ha ka office trei kam jong ki ha ka 10.10.2024. Ha ka jiniakren, ka seng ka kyrpad ia ki ba kin print ticket biang bad sam sha kito kiba la dep thied ticket, da kaba bthah ia ki paibah ban pynphai ia kito ticket jong ki bad ban shim da kiwei, kumjuh ruh ia kito kiba la bret ticket, da kaba buh por ia ki, nangta sa pynkhalai biang.
Na ka liang jong ka team Chi ïung Multipurpose Society kim pdiang ia ka jingai jingmut jong ka seng bad kila ong ba kin pynkhalai biang khlem da print ticket shuh. Ka seng ka dawa ba lada kim lah ban print ticket biang, dei ban aiti noh ban pyniaid da ka office jong u DC ban leh ia kaba donkam lane ban donate ia kane first prize sha ki jaka ri khunswet.
Dei ha kine ki nongrim ba ka seng AHPUF, ka pyrshah ia ka jingthmu jong ka Chi ïung Multipurpose Society ban pynkhalai biang ia ka first Prize lada kam lah ban ai tickets biang ia kito kiba lah bret ticket. Kumta kum ka Seng kaba trei na ka bynta ka bha ka miat ka imlang sahlang bad ka hok u paidbah, kam lah ban pdiang ba u paidbah un duh ia ka hok.