Ka Federation of Persons With Disabilities (FPWD) kaba kdup haduh 6 tylli ki seng jong ki briew kiba don jingduna hapoh ka jylla kala ai da ka jingujor sha ka Meghalaya Human Right Commission (MGRC), Shillong pyrshah ia u kyrtong MLA jong ka party Indian National Congress (INC) na ka Sohiong u bah Seiñ Osborn Kharjana ban pynshitom ia u, halor ka jingkren tohmet jong u shaphang ki briew kiba don jingduna, iathuh ka khubor bala phah mynta ka sngi.
Katkum kane ka khubor la iathuh ba u bah Kharjana kren ia ki kyntien tohmet bad ka jingbym kheiñ kor jong u ia ki briew kiba don jingduna, kaba la ktah jur ia ka burom bad ka jingsngew jong ki briew kiba don hapdeng ki jingduna. La iathuh ba u bah Kharjana ula kren iakine ki kyntien ha kawei na ki jingialang paidbah ialap elekshon jong u, kaba la kynthoh jur ba ki briew kiba don jingduna kim lah ban iaryngkat kyrdan ne kim lah ban leh ia ki kam kiba bha ha ka synshar shnong synshar thaw.
Na ka liang ka FPWD haba phah ia kane ka jingujor kala sot lang ruh ia kine ki kyntien kiba la pynmih ne kren da u bah Kharjana kiba ong “Nga ju ong ia kane kawei ka ktien ka long ba, haba ngi jied ia u Rangbah Shnong, phi ju jied ia uba matlah u rangbah shnong dei ne em? phi ju jied ia uba kyllut? ngin nym jied ia uba kyllut ngin nym jied ia uba kyllut, ia u bym nangkren, ia u bym lait kren ruh em balei phim jied ia uba matlah, ia uba kyllut ia u bym lait kren balei ym jied? ka daw ka long ba u don jingduna ha ka dkhot met bad ngi tip hi ruh ba um lah ban synshar, kata ka dei ka jingjia barabor”.
Ha kaba iadei bad kane, ka seng ka dawa ka jingpynshitom kaba jur ia utei u kyrtong uba la pynkhein ia ki kyndon jong ka aiñ katkum ka Chapter II & XVI kaba la kdew ha ka Rights of Persons with Disabilities Act 2016.
Ia kane ka juh ka jingujor ka seng FPWD kala phah ruh sha u Commissioner for Persons with Disabilities, ka sorkar jylla.