Hadien ba ka Hynñiewtrep Border Dispute Redressal Forum (HBDRF) kala ïoh ïa ka jingujor na ki ar ngut ki Khasi Pnar na Block-1 kiba ym shym kwah ban pynpaw kyrteng kaba la jia haka 6.6.2025 ha Iew Myn-i ba ar ngut ki briew na ka jait bynriew Karbi u wei uba tip kyrteng kum u Augustine Hanse bad u wei pat ym shym la tip kyrteng hynrei la ong ba u dei u dkhot ka Karbi Students Association (KSA).
Kine ki Karbi ki bat ïa kine ki Khasi Pnar bad ki maham ban rah ïa u wei na kine sha Hamren Police Station da kaba kynnoh ba dei ma u ba donkti ban pynshit lane ban khot ban wer ïa ki Khasi Pnar ha Block-1 ban wan sha ka Rally ba khot pynlong daka HBDRF ha Jowai ha ka 3.5.2025.
Nalor kane ruh kine ki Karbi ki maham bad pyntieng ïa ki ba kim dei shuh ban ïaleit ïawan sha kino kino ki meeting ki jingïalang paitbah ne ban ïakren ïa khana bad ki Khasi Pnar kiba don sha Meghalaya.
Lada don mano mano ba kylli ïaki hato ki kwah ban don sha Meghalaya ha kane ka jingïapynbeit pud te ki dei ban ong beit ba ki kwah bad hun ban don beit hapoh Karbi Anglong, Assam bad kim dei ban pynpaw ïaka jingkwah jingthrang bad ka hok jong ki ban don shapoh Meghalaya. Ki maham tyngeh ruh ba ki Khasi Pnar ki dei ban register noh ïaki jaka puta jong ki shapoh Karbi Anglong Autonomous Council, Assam bad kumjuh ban apply ïaki kot ki sla jong ki shapoh Assam bad lada kim leh kumta, kilah ban shah beh noh shi syndon. Ki dei ruh ban ngeit bad kohnguh beit ïaka ei kaba ki Karbi ki ong bad hukum. Ki maham ruh ba kim dei ban ïathuh ïa kane ka jingkren jong ki sha ki briew kiba don shane shapoh Meghalaya. Lada ki pyntip ne ïathuh te kilah ban shah pynïap ruh.
Haka jingïadei bad kane ka jingjia ka Forum haka 10 & 11.6.2025 kala leit ujor sha u Deputy Commissioner, u Abhinav Kumar Singh bad u Superintendent of Police Bah C. Syrti jong ka West Jaiñtia Hills District rangkat ka jingthoh bad ha jingïakren ka Forum kala kyntu ïa kine ki khlieh nongsynshar District ba ki dei ban shim khia ban ïakren bad ki bor District jong ka West Karbi Anglong ban pynneh pynsah ïaka shongsuk shongsaiñ bad kine ki jingmaham bad jingpyntieng jong kine ki Karbi ïa ki Khasi kan ym jia bad u DC bad SP ruh kila kular ban shimkhia ïa kane.
Ka Forum lyngba u Chairman jong ka u Chandame Sungoh ka kyntu ïaki paid Khasi Pnar baroh kiba don hapoh Meghalaya bad kiba don hapoh Block-I & II, ka sorkar, ki bor Police’ ki Sengbhalang bad ki paidbah ruh kidei ban ïa tylli ïa ryntih noh ban pynduh pyndam ïa kane ka jingshah lehbeiñ shah maham bad ka jingtieng jingrit mynsiem ki Khasi Pnar kiba shong basah ha Block-I.
“Ha kino kino ki kam ki jam, ki dorbar ne ki jingïalang ki Khasi Pnar nangne napoh Meghalaya bad kiba nangtei napoh Block-I ruh ki leit tuh leit rieh ki leit da ka jingtieng leit rit mynsiem ïoh tip ïoh lap ki Karbi’. Kane ka dei naka daw jong ka jingtieng ba wat ki bor sorkar ruh kim nud ban ïakren pyrshah bad ki nongïalam jong kiwei pat ki jylla. Bad naka daw ba ki Khasi Pnar ki burom palat ïaka shongsuk shongsaiñ. Kumta kiwei pat ki jait bynriew ki sa shim kabu noh ban maham bad pyntieng pynsmieij ïaki briew jong ngi kiba don shatei. I kumba dei tang kita ki Karbi kiba dei ki briew ma ngi pat ngi dei kum ki ksew. Tang maki ba don hok ma ngi pat ngim don hok. Hato ym dei ba ngi don ha ka juh ka Riti Synshar lymne kum ki nong India? Lada ngi tieng ngi shah jem kumne shi kumne te shi junom ruh ki briew jong ngi kin im kin sah haka jingsyier bad jingrit mynsiem. Kumta la dei kapor ba ngin pynduh noh ïaka jingtieng jing rit mynsiem bad ban kren ne pynpaw beit ïaka hok jong ngi lada ka long kumno kumno ruh”. Ong u Chairman ka Forum.
Ka Forum ka kyntu ruh ïaki pait Karbi ba ki dei ban burom ïa ki Khasi Pnar kiba dei ki trai ri trai muluk bad kim dei ban wanrah ïaka jing sngewpher jait bynriew ne ka jingïashun ïa bishni. Kim dei ruh ban pyntieng pynsmieij ïa ki Khasi Pnar bad kim don ka hok ban khang lymne maham ïa ki Khasi Pnar ban dawa ïaka hok jong ki ban wanrah biang ïa ka Block-I & II na Assam sha Meghalaya kumba la kubur hi da ka sorkar Assam ba kane ka jaka ka dang don hapdeng ka jing ïakhajia bad kam pat long pura shapoh Meghalaya ne Assam.