Ka Hynniewtrep Integrated Territorial Organization (HITO) West Jaintia Hills District hapoh ka jingialam u President ka seng u Pynbiang Rymbai bad Secretary u Cresene Ksoo bad u Organising Secretary Rimiki Lathong mynta ka sngi 1/8/2022 ki la leit ban ai dorkhas ha ka office treikam u District Veterinary and Animal Husbandry West Jaintia Hills District Jowai ban pynsngew halor ka jingeh jong ki nongrep ka ri lum Jaintia khamtam kiba ri jingri.
Ka seng na ka por sha ka por ka shait ioh ia ki jingujor na ki paidbah halor ka jingbymbiang ki dawai lane ki tika ia ki mrad bad na ka por shaka por ki paidbah ki shem jingeh bha ha ki kam ri jingri na ba bym shim khia ka sorkar bad ki jingpynshlur jong ka sorkar ia ki samla ban shim ia ka kam rep bad ri jingri ka long tang ha ka ktien khlem ka jingshim khia ha ka kam ban ai ia ki jingiarap kiba ki dei ban ioh.
Ha ka jingiakynduh u DVHO u Dr, D.I. Kjam u la kubur ba ka jingbym biang ki dawai dashin jong ki jingri ka long kaba shisha bad kane ka dei ruh na ka jingbym ioh bhah na ka sorkar bad kane ka kdew shai ba ka sorkar ka leh khun-nah ia kane ka tnad bad ka seng ka dawa ba ka sorkar ka dei ban shim ia ka sien jam ban pynioh jingmyntoi ia ki nongri jingri kaba long kum ka wei na ki lad ioh kam ioh jam la ong ka kyrwoh naka seng.