Ka Hynñiewtrep Integrated Territorial Organisation (HITO) Ksehryngshang Circle, Mynta ka sngi jong ka 11 tarik Lber, ka la leit ban ujor shisyndon ha u Deputy Commissioner, ka West Jaiñtia Hills District, halor ka jingpyntrei torti ia ka Jal Jeevan Mission (JJM) Scheme jong ka Ksehrynshang Combine, kaba dei ia ka shnong Kremlabit, Nongmulieh, Moobakhon, Nongthymme (Seh Lama), kaba la kot shaduh ka Rs. 7,20,34,450.00 (Hynniew Klur Ar phew Lak, Lai phew hajar, Saw spah sawphew) tyngka, ka pisa kaba la mang da ka sorkar kmie na ka bynta ka jingbit jingbiang ha kaba iadei bad ka um bam um dih, hynrei kat kum ka jinglap lyngba ka Right to Information (RTI), ki jingtrei ki long kiba torti haduh katta katta.
Kine jingpyntrei torti ne tangshu dep ki kynthup ia kiba bun ki work order kum kaba pyndonkam da ka Top um (Tank) ba rim ha kaba shu niad ne ai rong thymmai bad ia ki pipe barim ruh la pyndonkam biang, namar kat kum ka jingshisha ka skim ba la mang dei ban shna ia ki top um thymmai kumjuh ruh ki dei ban pyndonkam da ki pipe ba thymmai.
Ha jingiadei bad kane ka jingtrei torti ia katei ka skim na ka liang ka HITO Ksehrynshang Circle, ka la dep ban buh da ka shithi ha ka ophis Public Health Engineering (PHE), Rural Water Supply (RWS) Jowai Division, na ka bynta ka jingjurip lang (Join Inspection) ia kitei ki project, hynrei na ka liang katei ka ophis ka khlem shim khia ia kane ka kam haduh mynta.
Katkum ha ka jingleit jurip jong ka seng, ka la lap ia ki jingshisha ba ka jingtrei kam iahap satia katkum ba la mang da ka sorkar lyngba ka PHE WRS department.
Te na ka liang ka seng ka la kyntu jur ia u DC ban shim khia halor kane ka jingujor bad ban thung ruh da ka kynhun tohkit (Inquiry) khnang ban lap ia ka jingshisha halor ka jingbym biang ia ka jingpyntrei ia katei ka skim JJM ha kitei ki shnong.
Te na ka liang ka seng ka la maham tyngeh ban ujor sha ka Ministry of Jal Shakti, Government of India New-Delhi, halor ka jingpyntrei tang dep ia katei skim ha kitei ki shnong. Ia kane ka kyrwoh la phah da u Phresmi Suting President HITO Ksehrynshang Circle.
