Mynta ka sngi ka Hynniewtrep Integrated Territorial Organization Sahsniang Arae ( HITO- SA) kala leit ban buh syndon da ka jingujor ha u Superintending Engineer ka MeECL, Jaintia Hills Division, halor ka jingslem palat jong ka tnad MeECL ban pynioh bor ding sha ki shnong ha ki thaiñ Sahsniang.
Katkum ka jingshem jong ka seng ka lap ba ka MeECL kala dep ban wan pyndait ia ki Meter naduh kine ki bnai kiba la dep, hynrei kaba i phylla pat ka long ba ia ki electrict pole ban ring tyllai bor ding haduh mynta ym pat don u wei ruh uba ki tnad kala dep ban pynieng. Kane ka la pynlong ia ka seng ban tuklar ia kane ka kam, namar ba na ka liang ka sorkar pdeng (India) kala dep buh thong ban pynioh bor ding sha baroh ki shnong hapoh ka ri ki bym pat ioh bor ding elektrik. Hynrei ka tnad MeECL pat ka dang leh mynthi halor kane.
Kumta ka seng ka dawa na ka tnad MeECL ba ka dei ban pyndep ia la ka kamram bad ban pynpoi kloi ia ka bor ding sha ki shnong kiba don hapoh ka Area Sahsniang.