Ka Jaiñtia Student Union (JSU) Seng Kmie mynta ka lah sngi U Blei kala leit ban buh da ka jingujor sha ki ar tylli ki ophis Superintendent of Police (SP) jong ka East bad West Jaiñtia Hills, halor ka jingïoh rung beaiñ palat jong ki nong Bangladesh ban wan buhai shnong shapoh u pud u sam jong ka Ri-Lum Jaiñtia.
Ka seng kala kyntu jur ïa ki bor Pulit ba kin ïatreilang bad ki shipai Border Security Force (BSF) ban khanglad katba lah ïa kane ka jingïoh rung beaiñ jong ki nong Bangladesh, da kaba pynlong ka jingtalasi kaba jur bha khamtam ha ki bynta khappud kum na ki thaiñ Umkiang bad na Dawki.
Ka seng kala buh ka jingkyntu ban pynrkhing bha ha ki jaka ba don ki ‘Check Gates’ da kaba pynbun shuh shuh ïa ki Pulit bad kumjuh ïa ki shipai ïada khappud, ba kin talasi ïa baroh ki jait kali, khamtam eh ïa ki kali Tourist kiba ju wan kit manka por ïa ki nong Bangladesh.
Na ka liang ka seng ka kyrmen skhem ba ki bor ba dei peit kin shimkhia mardor ïa kane ka jingdawa, kaba long ruh ka lad jingïada ïa ki trai jylla bad ban lait na kano kano ka jingmih ïakhajia hadien habud.
