Ki dkhot ka Jaiñtia Women Council (JWC), ha ka sngi Nyngkong, ki la ujor sha u Deputy Commissioner jong ka East Jaiñtia Hills District halor ka jingleh jong ka kompeni Meghatop bad ki bor pynïaid distrik. Ki la pynpaw ïa ka jingsngewkhia halor ka jingshah khang ban ïashim bynta ha ka jingïalang paidbah kaba la long ha ka 18 tarik u October, 2024.
Ha ka shithi jong ki, ki dkhot jong ka JWC ki la pynpaw ia ka jingsngew lyngngoh jong ki namar ba ki la shah khanglad ha ki pulit katba ki dang wan shajan katei ka jaka. “Ngi la iakynduh bad ki pulit kiba bat ia ki lathi, kumba ngi long kita ki nong pynmih jingkulmar, kaba ngi kwah ka long tang ban pynpaw ia ki jingmut jong ngi,” ki la pynpaw.
Ki la kdew ruh ia ka jingdon jong ka khyrdop talasi jong ki pulit ha Umtyra, kaba pyni ba ka distrik ka la thmu lypa ban khanglad ia ka jingwan jong ki.
Ka JWC ka la pynpaw shuh shuh ba, ha ka jaka ba ki pulit kin peit bad sylli ïa ka jingshongsuk shongsaiñ, la shah pynban ban buh ïa ka kynhun ki riew paidbah ban khanglad ïa ka jingrung jong ki. “Kane ka pyni shai ia ka jingbym lehhok bad ka jingthmu kaba lah ban long kaba la thmu lypa da ki heh jong ka distrik,” ki la kynthoh.
Ha kaba iadei bad kane, ka JWC ka la dawa na u Deputy Commissioner ban pynthikna ia ka jingbishar kaba hok bad ban pynlong biang ia ka public hearing sa shisien. Nalor kata, ki dkhot jong ka konsil ki la ïalum lang shabar ka ophis u Deputy Commissioner ban dawa ïa ka hok jong ki bad na ka bynta ka jingbym ioh ban iashim bynta jong ki ha ka public hearing jong ka Meghatop Cement Pvt. Ltd.