Halor ka jingkynnoh ba khlem nongrim jong u Saket Gokhale uba dei u nongaiktien jong ka party TMC pyrshah ia ka sorkar Jylla, ka Meghalayan Age Limited kala ujor da ka mukotduma pyrshah ia utei u rangbah uba la kynnoh pyndonkam bakla ia ka pisa kaba T.630 klur tyngka.
Ka Meghalayan Age Limited kaba dei ka company ba pyniaid da ka sorkar Jylla lyngba ka tnat Planning bad la rejister ia ka hapoh ka Section 2 (45) jong ka Company Act, 2013. Ia ka Meghalayan Age la thaw kyrpang na ka bynta ban pyntrei ia ki projek bapher bapher khamtam ha ka jingpynkiew ia ki kam jngohkai hapoh ka jylla, da kaba pynlong ia ki jait tamasa bapher bapher bad ruh ka jingpynneh pynsah ia ki matti jong kiba rim bajah.
Ia kane ka jingujor ka Meghalayan Age Ltd kala ujor hakhmat ka ïingbishar jong u Chief Judicial Magistrate ka East Khasi Hills District, Meghalaya katkum ka Section 200, 190 jong ka Criminal Procedure Code, 1973 ban dawa pynshitom ia u Saket Gokhale halor kitei ki jingkynnoh khlem nongrim jong u ia ka jylla.
Katkum kane ka jingujor la pynpaw ruh ba u Gokhale u ju mlien ban pynjah buromm ia ki shakri sorkar barabor. Ha kaba ka ïingbishar badonburom jong ka Delhi High Court ha u snem 2021 kala pynmih ia ka hukum pyrshah ia u Gokhale bad la btah ia u ba hashwa ba un kynthoh iano iano u dei ban wan shwa ia ki sabut bad ki sakhi satar kiba biang. La batai ruh ba u Gokhale ula shahkem ha ki Pulit jong ka Gujarat ha kine ki khyndiat bnai halor ka jingpynsaphriang jong u ia ki khubor lamler halor ka jingjia hapoh ka jylla Gujarat.