Ka Seiñraij Mupyut hapoh ka jingialam jong i bah Pher Pohsiej kum u Chairman bad i bah Dre Dkhar, Secretary ki la wan ban ai kyrkhu kyrdoh ia u ma Saron Pasweth, MDC na ka bynta ka election MDC ka ban sa wan.
Ka jingwan jong kine ki dkhot ka Seiñraij Mupyut, kadei hadien ba lah dep ia phylliew jingmut napoh ka seng, ia kaei kaba une u MDC u la dep lehbha na ka bynta ka seng bad ruh ia ka shnong hi. Lawan ban synran lang da ki katto katne ngut ki dkhot ban mih khmat na ka bynta ka Seiñraij. La pynlong ia ka duwai ka phirat na ka bynta u candidate wat lada um ioh shuh ban iadon bad ki, hynrei u Blei un ialam ia u, ka lynti babha bad ba paka.
Laioh ka jingkren na u Secretary, Seiñraij Mupyut, uba la pynsngew ka jingduh ka bakhraw ha kane ka delimination ne ka bhah constituency, ba ki laduh ia u ma Saron kum uwei na ki MDC ba la trei bor bah ia ki kam, kumba u la kular. U la ai kitbot kitrwiang da ki kyntien bakhia ba u ma Saron un jop don burom biang ha kane ka kynti ruh, da ka jingkyrkhu jong u Blei.
“U briew ba ngi iohi tang ia ka khmat phuhsamrkhie bad ba iadei paralok ia baroh hapoh ka shnong ka thaw ha kajuh ka por hapoh ka Seiñraij Mupyut”, ong u bah Pher Pohsiej. U la pynpaw ka jingsngew diaw mynsiem, da kaba ong, tip ngin ioh ne ngin ym ioh MDC shuh kiba kum u ma Saron, ha kajuh kapor u khmih lynti ia kaba bha, ba u MDC u ban sawan na ka constituency ka jong ki, un salong kumba shait long une u barim.
U la kyntu jur ia ki paid ka constituency na ka Jowai South ba kimdei ban shah ialam bakla, da kano kano ka lynti ba kinduh ia une u MDC u baiaid ka lynti bakhuid bad ba hok. U bah Pohsiej, u la ai ka jingkyrkhu da ka ong, to u Blei un don ryngkat bad phi ma Saron ha ki kam baroh, ba phin jop donburom ha kane ka kynti bad phin ioh ban pynurlong ia baroh ki jingthmu ki jongphi.
La sakhi ia kane ka jingwan ka jong ki, da ki katto katne ki dkhot ka Block Congress kiba iadonlang bad u candidate.