U ma Sniawbhalang Dhar uba dei u Deputy Chief Minister jong ka Jylla Meghalaya ha ka sngi ba bud jong ka jingpyllait paidbah ia ka Phlim Johkhe.com (Johkhe dotcom) kaba la pyni ha Bijou Cinema, Police Bazzar, Shillong ula wan dalade ban sakhi ia kane ka Phlim bad ruh ban ai mynsiem ia ki nongpynmih ne ki nongshna jong kane ka Phlim.
Haba kren ha kane ka sngi u ma Sniawbhalang Dhar u ong ba u thrang ban long u kongsan ban ioh pyllait paidbah ia kane ka Phlim hynrei na ki daw bym lah kiar um shym la iohlad satia, hynrei kane kala pynsahnud ia u, kat haduh ba ula pyllait por khnang ha kane ka 9 tarik mynta u bnai ban leit peit ia kane ka Phlim ha Buju Cinema.
Na ka liang u ma Dhar ula ai mynsiem bad pynpaw ba u kyrshan pura ia ki nongpynmih jong kane ka Phlim bad u kyrmen ba kane ka kynhun kan dang lah shuh shuh ban iaid shakhmat ha ki kam pynmih ia ki Phlim Khasi lane Pnar, khnang ba yn lah ban pynithuh ia ka jaidbynriew bad ruh shi bynta ban pyniar shuh shuh ia ka ktien ka thylliej bad ka sap ka phong jong ki nongak Phlim bad ruh ki nongpynmih Phlim napoh ka Jylla la jong. Ula kyntu ruh ia kiwei pat ki para nongmihkhmat jong u ba kin wan ban peit ia kane ka Phlim, khnang ba kan nang ai mynsiem shuh shuh ia kane ka kynhun.
Ka jingpyni ia kane ka Phlim ha nongbah Shillong la pynkylla ia ka kyntien sha ka Ktien Khasi bad ynda la wanrah ia ka sha Jowai yn sa ai pat da ka ktien Pnar. Katkum ka jingiathuh jong ki nongpyniaid jong kane ka Plim ba kan dang neh ha Bijuo Cinema kumba Laitaiew ei ei bad hadien kata yn sa wan rah pat ia ka sha nongbah Jowai.
Kum ban shu pynkynmaw ia kane ka Phlim Johkhe.com la Direct da u ma Marboon Laloo bad u Da-Oo Toi ba la Produce ia ka da u ma Miki Garod, u Co-Producer ma Rimitre Lato, ki nongak (Actors) ki long u ma Marboon Laloo, Daohipaia Toi, Konel Phira, Rishwa Suchiang, Rimika Dkhar bad Tammiki Rymbai. Sa shisien na ka liang jong ki nongpyniaid jong ka Johkhe.com ki kyntu ia ki paidbah jong ka rilum Khasi bad Jaiñtia ba kin sngewbha ban ai ka jingkyrshan lang ia kane ka Phlim, khnang ba kan lah ban wanrah ka jingmyntoi ia ka kynhun bad ruh ka ka ri bad ka Jaidbynriew hi baroh kawei.