Ka seng jong ki nonghikai kiba don hapoh ka lama jong ka Meghalaya Upper Primary School Teachers Association (MUPSTA), mynta ka sngi ki la pynlong ia ka jingialang ne ka 5th Special Annual Conference, ha Madan Khwang jong ka shnong Ummulong WJHD, ka ba dei shi bynta na ka jingrakhe dap 30 jong kane ka seng ki nonghikai. U myntri ba dei peit ia ka tnat pule puthi ka sorkar Jylla u Rakkam A. Sangma u la long u Kongsan.
U kongsan ha ba kren haba kren ai mynsiem ia ki nonghikai, ha kane ka sngi u la ai ka jingiaroh ia baroh ki nonghikai kiba hap hapoh ka MUPSTA kiba la ai ka jingshakri la 30 snem kynthi, u la ong ba na ka liang jong ka sorkar kan wad ki lad ki lynti ha ka ban ia iarap ban kyntiew ia ka jingsiew jong ki nonghikai kiba don hapoh ka seng ka Meghalaya Upper Primary School Teachers Association (MUPSTA), u la ong ruh ba kumba long mynta ka sorkar hi kam shym la shong kli kti ha ka ban wad ki lad ki lynti ban ai ka jingiarap ia ki.
Hynrei u la ong kaba kongsan kum ki nonghikai ki dei ban shakri hok ia ka kam khnang ban kyntiew ia ka jingnang jingstad jong ki khynnah hapoh ka jylla Meghalaya, u la ong ym tang ia ki nonghikai hynrei ia ki kmie ki kpa bad ia ki nongmihkhmat jong ka jylla ki dei ban don ka jingiatreilang ha ka jingiadei bad ka jingnang jingstad, namar kum ba long mynta ka jylla Meghalaya ka don ha trai duh ha ka jingiadei bad ka pule puthi kumta u kyrpad jur khamtam ia ki nonghikai ba ki dei ban long kiba trei shitom khlem da buh ia kata ka jingeh kaba ki don.
Mynta ka sngi ki nonghikai na kylleng ki District jong ka jylla kiba don hapoh ka lama jong ka MUPSTA ki la wan sha kane ka jingialang bad la pynphuh pynphieng ia kane ka sngi da ki jingrwai jingshadtynrai kaba la shim bynta da ki dkhot jong ki District bapher bapher.
