Ka Raij Ialong kaba kynthup ia ki lai tylli ki shnong, Ialong, Wahiajer bad ka Nongkhyllep hadien ka jingpynkhreh kaba khyndai sngi lynter (22-30/04/2024) bad hapoh kine ki khyndai sngi shwa ka Nohsakyryiat kaba la long mynta ka sngi, ki la pyndep ia ki jinglehniam jong ka Raij kum ka kñia Syiem Ryngkaw lane thoh Ryngkaw, ka kñia Syiem Duwan (thoh Langdoh) bad kiwei de ki jinglehniam shwa ba ki nongshong shnong jong ka Raij kin hiar ban rep ban riang sha ki Hali ki Pynthor jong ki. Ia kane ka jinglehniam thoh Ryngkaw ne Syiem Ryngkaw bad kñia Syiem Duwan lane thoh Langdoh, ki la pyndep hynne ka sngi 30 tarik Iaiong 2024 dangstep phyrngap shwa ban riew ka Tyngap.
Ha kane ka kñia Syiem Ryngkaw, ym lah ban kñia da uno uno u Yiar Ryngkuh hynrei da u Yiar Ryngkuh uba iong ki Kjat kum juh ha ka kñia Syiem Duwan ne thoh Langdoh, ki kñia da ka Yiar kynthei bad ym da kano kano ka Yiar kynthei hynrei da ka Yiar kynthei kaba rong stem. Ia ka kñia ka khriam bad ia baroh ki jinglehniam la pyndep da u Langdoh jong ka Raij bad la ong ba baroh ki jinglehniam ki la long kiba bha kiba miat bad kiba la pdianghun da U Blei, ki Blei, ki Ryngkew ki Basa jong ka shnong ka thaw bad ka Raij hi baroh kawei.
Kum ka dak ka jingkmen ia kane ka jingsngewbha bad jingpdianghun jong ki Blei ia ka nguh ka dem ka kyrpad ka kyrpon jong ki Nong shong shnong jong ka Raij kum ka dak ka jingiakmenlang Ki Blei bad ki Briew, ka Raij Ialong ka la pynlong ia kane ka jinglehkmen Nohsakyryiat mynta ka sngi (30/04/2024) ha Ialong, ha kaba u Doloi ka Elaka Jowai, Pa Daloi Puramon Kynjin u la long u kongsan.
U Pa Doloi Puramon Kynjin ha ka jingkren jong u ha ryngkat bad ka sneng ka kraw ia ki khun ki hajar jong ka Raij Ialong, u da iathuh ia ka Khanatang (History) lyngkot ia ka jingdon ka shnong Ialong hapoh ka Elaka Jowai. U la ong ba ha ki por kiba kham mynshwa ka shnong Ialong ka don hapoh ka Ekala u Doloi Nangbah, hynrei da ka jingdon ki Mar, ki Khlawait (Giants) kiba ialeh pyrshah ia ki Phareng kumta la pyniasoh ia ka bad ka Elaka Jowai bad kumba long mynta ka shnong Ialong ka don hapoh ka Elaka u Doloi Jowai.
Shuh shuh u Pa Doloi, Puramon Kynjin haba kren ha kane ka sngi, u pynpaw ia ka jingkmen ka bakhraw ba hapdeng kiba bun ki Raij hapoh ka Elaka bad hapoh ka Rilum Jaiñtia, ka Raij Ialong ka dei kawei na ki Raij kaba ri kyndong bad pynneh pynsah ia ki Riti ki Dustur kaba la saiñdur da ki Longshwa Manshwa bad u kyntu ia ki khun ki hajar jong ka Raij Ialong ban nangpynskhem ia kaba la saiñdur da ki longshwa manshwa bad nangpynbha bad pynphuh pynphieng shuh shuh ha ki snem bad ki por ki ban dangwan. Nangta u ong haba im ka Niam, ka Riti, ka Dustur, im ka jaitbynriew haba iap ka Niam ka rukom, ka Riti ka Dustur iap ka jaitbynriew bad u pynkut ia ka jingkren bad ka sneng ka kraw jong u, u kyntu ym tang ia ki khun ki hajar jong ka Raij Ialong, hynrei ia baroh ki nongshong shnong jong ki Raij kiba don hapoh ka Rilum Jaiñtia ban nangpynneh ia ki Riti, ki Dustur, ka Ktien ka thylliej, ka riam ka beit bad ban im tipbriew tipblei, tip Kur, tip Kha, tip Kher tip Mer, ha ka Akor ka Burom, ha ka imlang ka sahlang, ban ia imlang sahlang bad wat ym ailad ia ka jot ka pra hapoh shnong hapoh thaw, ha ka Raij, ha ka Elaka bad nangiai imsngi ha kaba tei ia ka jaitbynriew ba kan nangiaid shaphrang ha khmat ka pyrthei.
Ha kane ka Nohsakyriat la iashim bynta shongshit da ki khun ki hajar jong ka Raij Ialong. Kham hashwa la ioh ia ka jingkren pdiang burom ia baroh da u President jong ka Raij, Waheh Pyrkhat Shylla bad ia ka Programme jong ka Nohsakyryiat la pyniaid da u Waheh Ujuhi Pale uba long ruh u Secretary jong ka Raij.
Yn pynkut ia ka jinglehkmen ka Raij Ialang da ka shad Sukra ka ban sa long lashai ka sngi (1/5/2024) ha ka juh ka jaka bala pynlong ia kane ka Nohsakyryiat.
