Mynta ka sngi u Myntri Rangbah ka Jylla u Conrad K. Sangma ula wan ban aiti ia ka song pisa kaba T.1 Klur tyngka kaba hapoh ka Meghalaya Healthcare Advancement Policy (MHAP) sha ki nongpyniaid jong ka Dr. Norman Tunner Hospital, Jowai, na ka mang pisa kaba T.2 Klur tyngka ia kane ka Hospital.
Ia ka pisa kaba dang sah sa shi klur tyngka yn sa pyllait hadien ba ka Hospital ka la lah ban pynbiang ia ka Utilization Certificate jong ka First Installment.
Kane ka dei ka skhim kaba la mang haduh T.10 klur tyngka na ka bynta ban pynioh jingiarap sha ki jaka sumar (Hospital) ba pyniaid da ki riew shimet.
Haba kren ha ka jingialang, u Myntri Rangbah u la ong ba kane ka dei shibynta na ka jingiatreilang jong ka sorkar bad ki Hospital ba pyniaid da ki Missionery bad kane kam dei ka sien ban long tang shisien hynrei ka jingsdang jong ka jingiatreilang ba ianeh. Kane ka skhim kam don ka jingteh kyndon ia ki Hospital ban pyllut, hynrei ki lah ban pyndonkam katkum ka jingsngewbit sngewbiang jong ki.
U Myntri Rangbah ula pyntip ruh ban yn sa pynlong ia ka State Level Healthcare Conference ban kyntiew ia ka jingiatreilang jong ka sorkar bad ki jaka sumar jong ki riew shiment ne ki Mission. “Ngi dei ban iaid shakhmat ryngkat ryngkat ban iasam ia ki jingmut, ban weng ia ka jingiajngai, bad ban shakri khambha shuh shuh” u la ong.
U la pyntip ruh ba ka jingshimkhia jong ka tnad ka koit ka khiah kala wanrah ia ka jingduna jong ka jingiap jong ki longkmie ba khakhun sha ka 45 % na ka National Average. Ha kaba na ka liang ka sorkar jylla kala pyntreikam ruh ia ka CM Safe Motherhood Scheme. Nalor kata ka sorkar kala pyndonkam ruh da ki juk stad ka juk mynta ban jurip halor ka jingpunkhun kaba lah ban ktah ia ka jingim, da kaba ai ka jingpynsngewthuh ha ka por kaba biang sha ki longkmie.
Ia ka jingialang ha kane ka sngi, la pyniaid da u Rev. S. Lamare uba la pynpaw ia ka jingsngewnguh ia ka sorkar kaba la kyrshan man la ka por ha ka jingiadei bad ka skul ai jinghikai ia ki Nurse ha kane ka Hospital.
Na ka liang jong ka Dr. D. Nongpluh kaba dei ka Medical Superintendent, ka la pynpaw ia ki jingdonkam ba kyrkieh jong ka Hospital kum ka ‘Renal Dialysis Unit’ nalor kiwei de ki jingdonkam ba kongsan jong ka Hospital.
Ha kane ka sngi la iadonlang u Symbud Myntri Rangbah ma Sniawbhalang Dhar, u ma Wailadmiki Shylla MLA, Jowai, ma Comingone Ymbon, u CEM ka JHADC ma Thombor Shiwat, u S.P. ma S. Syrti IPS, ki Pastor bad ki Doctor jong katei ka Hospital nalor kiwei de.
