U myntri Rangbah ka Jylla u Conrad K. Sangma mynta ka sngi Saitjaiñ ula wan ban plie ïa ar tylli ki mawnongrim ha Jowai, kata ban shna ïa ka Integrated Development Complex (Mini Secretariat) bad ban plie paidbah ïa ka Maternal & Child Health Hospital kaba don 100 jingthiah ha Panaliar Jowai.
Ha kane ka sngi la pynlong ïa ka jingïalang ha phyllaw ka PWD Jowai ha ka jingdonlang u myntri ka Urban Affairs badTourism u ma Sniawbhalang Dhar, u MLA ka Jowai ma Wailadmiki Shylla, u Deputy Commissioner ka West Jaiñtia Hills District bah Batlang S. Sohliya IAS, u Chief Executive Member ka JHADC ma T. Shiwat nalor ki kynrem ki lyndan, ki nongrep bad ki paidbah nongshong shnong.
ïa kane ka Integrated Development Complex (Mini Secretariat) yn tip ïa ka kum ka District Secretariat ïa kaba la mang pisa kumba T.20 klur tyngka da ka GAD jong ka sorkar jylla bad ka jingpyntrei kan sdang noh shen ïa ka ha compound jong ka PWD kaba don ha shnong Ladthadlaboh, West Jaiñtia Hills District.
Ïa kane ka jaka kaba la thmu ban shna kum ka Mini Secretariat la wan ban jurip da u Myntri Rangbah ha ka 7.11.2020 ha kaba ula kular ban shan ïa kane ka Mini Secretariat na ka bynta ka jingmyntoi jong ki paidbah nongshong shnong jong ka District hi baroh kawei.
Katkum ka plan ban shna ïa kane ka Complex ka long da ka G+3 Storey Building kaba don lai bynta ka Block (East, West bad North Block) kaba lah ban kot haduh 40 klur tyngka bad ha ka jingheh jong ka jaka kaba 14,700 sqm lane 3.63 Acer.
Ha kane ka ophis ym pyntreikam ïa kiba bun ki tnad sorkar kum ka DC office kaba kynthup ruh ïa ki tnad kum ka Election Branch, Supply, Revenue, Planing, Basin Development, Social Welfare, District Child Protection, ka tnad Sports, Treasury officer, Excise, IPR, Tourism, Border Area, Mining bad kiwei de ki tnad sorkar kiba dang treikam mynta ha ki ïing shong wai jong ki riew shimet.
Ha kane ka juh ka sngi u Myntri Rangbah ula pynbna ruh ba la plieh noh ïa ka Maternal & Child Health Hospital kaba don 100 jingthiah ha Panaliar Jowai ïa kaba la buh mawnongrim ban tei naduh ka 5 tarik u March 2014 bad la lah ban pyndep shan ïa ka ha ka snem 2017 bad mynta ka sngi la wan ban plie ïa u mawnongrim da u myntri rangbah ka jylla ha kane juh hi ka jaka ba pynlong jingïalang.
Kane ka jaka sumar kan ai jingsumar kyrpang ïa ki longkmie ba armet bad ki khynnah rit, la ïathuh ba hapoh ka District ka jingbun briew kala poi sha ka 4 lak, tang ki longkmie bad ki khynnah ki don 9299 bad 8932 ngut.
Kane ka jaka sumar mynta kala don ïa ki nongtrei la dep ban thung ban pynïaid ïa ka kiba kynthup ar ngut ki Pediatrician bad 2 ngut ki OBC Specialists ha ryngkat ki Staff Nurse bad kiwei de nongtrei kiba dang trei mynta ha Jowai Civil Hospital Ialong.
U Myntri Rangbah haba ai jingkren ula ong ‘Ngi don hangne ka long ban pynkiew ïa ka jylla hi baroh kawei wat lada ki don shibun kiba kynthoh na kiba bun ki liang’, na ka liang ka sokar ruh kala ïaleh ban pynbha ïa ka jingshakri ha ka liang ka koit ka khia.
Ula ong hapoh ka jylla la dep ban pynkiew sha ka 1000 tylli ki jingthiah ha ki jaka sumar ha kine ki por jong ka khlam Covid-19 bad haduh 250 klur la dep ban pynlut ha ka ban shna ïa ki jaka sumar naduh ki Sub-Center, ki Laboratory, ki jaka thiah bad kiwei kiwei de.
Ula ong ba ka jylla ka la don ha ka kyrdan kaba saw (4) hapoh ka Ri kaba la pynlut buh eh ka pisa ha ka liang ka koit ka khiah, ula pynthikna ba ka sorkar kan ïaleh ban pynbiang sa ïa ki Doctor katkum ka jingïateh kular kaba la dep ban ïasoi.
Ha kane ka sngi na ka liang u Myntri Rangbah ula sam ruh ïa ki synbai sha ki nongrep ka District.