Mynta ka sngi saitjaiñ 9 tarik Nailar, ki paidbah nongshong shnong ka Jowai bad ki shnong ba marjan ryngkat bad ki kynhun bapher bapher, kila wan sha ka jingialang ba la khot da Khooid Ya Ka Wah Myntdu (KYM), na ka bynta ban iada bad wad ki lad ban pynneh pynsah ia ka jingkhuid ka Wah Myntdu, ka wah kaba bsa um bam um dih bad kumjuh ruh ban ai um ia ka rep ka riang jong ki briew ha nongbah Jowai kumjuh ruh sha baroh kiba don lyngba kane ka wah. Ia kane ka jingialang la pynlong ha Chilliang Raij Community Hall, Jowai.
Mynta ka sngi na ka liang u President ka KYM ma KL Pariat, u la ong ba ka jingthrang jong ka seng halor ka jingkhuid jong ka wah Myntdu mynta la kumba 5 tylli ki snem bad kaba dangiaid lynti haduh mynta, ka seng ka la iohi bad ioh sngew ruh ia ka jingud jong ki paidbah haka jingiadei bad ki jingshah ktah jong kane ka Wah Myntdu kumba long mynta.
Kumta, u la ong ba ha kane ka jingialang, ka KYM ka kyntu jur iaki briew kiba don jaka ha ki rud jong kane ka wah ba kim dei ban leh jakhlia khnang ba ki briew kiba pyndonkam um na ka Wah myntdu kin ioh iaka um dih um bam kaba bha lyngba kane ka wah, khamtam ruh ia ka pateng ka ban dang kin ioh ban pyndon ia ka um kaba khuid ba suba. Shuh shuh u la ong ba ka KYM ka kyrpat ia kiba dei peit ba kin shah ban shna ïing briew kaba jngai kumba 100 meters na ka wah, kaba long kawei na ki jingiada ia ka jingkhuid jong ka wah.
U la ong ruh ba ka KYM ka la kyrpat ia ka sorkar lyngba u CM, C. Sangma bad kumjuh ruh ia u Dy.CM ma S Dhar k ba kin pynbha bad iada ia ki rud jong ka Wah Myntdu, kaba dei tang kane ka wah kaba bsa um ia shibun ki mynsiem.
Ha kane ka jingialang mynta ka sngi la ioh ruh ka jingai jingmut na u ma Rupaia Lamar dkhot ka KYM, ma Snar Laloo, ma SK Lato bad kiwei de, kiba kynthup naduh ki Waheh Shnong, General Secretary Synjuk Waheh Chnong Ri Jaiñtia, Sein Raij Jowai, President, General Secretary ka Synjuk Waheh Chnong Jowai, ki seng Kynthei, Seng bhalang, ki dkhot jong ka seng ki nongkhwai dohkha bad kiwei de.
Na ka liang u President ma KL Pariat u la ong ruh ba hadien ka jingialang ka ban long ha nongbah Delhi ha kane ka 22 traik bnai August, kan sa khot biang ia ka jingialang na ka bynta ban pynsngew ia kaei ba ki wanrah na ka jingialang ha katei ka nongbah Delhi.
