Mynta ka sngi la pynlong ia ka Viksit Bharat Sankalp Yatra (VBSY) kaba dei ka prokram ban pynsngewthuh paidbah ia ki skim bapher bapher jong ka sorkar kmie. Ia kane ka prokram la pynlong mynta ka sngi ha Madan Ladthalaboh, Jowai ha kaba ki paidbah ba bun kila wan ban sngap ia kine ki jingpynshai kumjuh ruh ban ioh ia ka jingai jingsumar ei.
Kane ka prokram ka dei kaba la iaid kylleng ki shnong da kaba pyndonkam ia ka kali ba la tip kum ka Urban IEC (Information, Education and Communication) Van. Ha kane ka IEC campaign ba la pynlong mynta ha Ladthalaboh kala don ka jaka checkups ia ki paidbah, ka jingpynioh ia ka Aadhaar Card bad ka jingpynthymmai la leh ha katei hi ka jaka, la pynsngewthuh ruh shaphang ki skhim sorkar hapoh ka PM SVANidhi. Nalor kine ki prokram la pynlong ruh ia ka Quiz Competition halor ka skim bapher bapher bala wan ban iashim bynta da ki samla.
Kala don ruh ka jingshim soskular ia ka Viksit Bharat Sankalp Yatra ban pynlong ia ka ri India kaba roi ba par bad kaba kyrshan dalade ialade hapoh u snem 2047
Kum ban pynkynmaw ba kane ka Viksit Bharat Sankalp Yatra ka dei kaba la sdang da u Prime Minister jong ka ri u Narendra Modi ha ka 15 tarik u Naiwieng 2023, da ka jingthmu ban ai ka jingpynsngewthuh sha baroh ki paidbah ban tip ia ki skhim sorkar bapher, ha ka liang ka jingkhuid jingsuba, ka jingpynioh lad jingiarap lyngbah ka pisa, ban pynioh ia ka LPG cylinder, ka jingpynioh ïing ia kiba duk, ka jingpynioh bam, ki jingbam ba tei met bad ka jingkoit jingkhia ba pura. Kane ka jingiaid campaign (Yatra) ka don jingthmu ban pyndep haduh 2.55 lak ki Dorbar Shnong sha ki thaiñ nongkyndong (Gram Panchayats) bad 3600 ki shnong ba hap hapoh ki bynta sor (Urban Local Bodies) hapoh ka 25 tarik u Kylla Lyngkot 2024 kata da kaba poi lut sha baroh ki District hapoh ka ri.
