Kum shi bynta na ka Media Tour ba la pynlong da ka PIB Maharashtra, wan iuhkjat ki Nongthoh Kotkhubor na Maharashtra sha Meghalaya
Ka kynhun kaba 14 ngut ki Nongthoh khubor na ka jylla Maharashtra mynta ka sngi ki leit ban jngoh ia ka Mawlynnong, kaba long kawei na ki shnong kaba khuid tam ha ka dewlynnong Asia. Ka kynhun ki nongthoh kotkhubor ki la iaroh ia ka jinglah ka jylla Meghalaya ban kyrshan bad pynneh ia ka rukom rep bad ka rukom im kaba ia hap bad ka mei mariang. Kane ka kynhun ka la leit ruh ban jngoh ia ka Shnongpdeng bad ban lehkmen baroh shi janmiet harud ka um ba khuid ka wah Umngot.
Ki nongthoh khubor na kylleng ka jylla Maharashtra ki la ia mih ban leit shang kylleng ka jylla Meghalaya bad Assam naduh ka 29 tarik u Risaw, 2023 haduh ka 4 tarik u Naiweing, 2023 kum shibynta na ka Media Tour ba la pynbeit da ka Press Information Bureau (PIB), Maharasshtra – Goa, ka Ministry of Information and Broadcasting, ka sorkar pdeng. Ki nongthoh khubor kiba ia shim bynta ha kane ki la poi mynnin ka sngi ha nongbah Guwahati ha kaba la pdiang burom ia ki da ki trai jylla.
Ha ki sngi ban wan, kine ki nongthoh khubor kin sa leit ban jngoh ia ki seng bapher bapher bad ia ki riew pawkhmat ka jylla Assam bad Meghalaya. Napdeng ki seng ba bun ba kin leit jngoh, kin kynthup ruh ia ka Assam Rifles, North East Council, Khasi Autonomous Hills Development Council, Assam Police, Tourism Department, AIIMS -Guwahati, IIT-Guwahati nalor kiwei pat. Kan don ruh ka jingia phylliew jingmut hapdeng jong ki bad ki nongthoh khubor kane ka jylla.
Kane ka Media Tour ka khmih lynti ban ioh ka lad ban sngewthuh ia ki jingpynsdang ba la shim khia da ka sorkar jylla ha ka jylla Meghalaya bad Assam jong ka thaiñ shatei lam mihngi. Ka don ruh ka jingangnud ban ioh ban sngewthuh ia ka rukom ioh pateng jong ki briew ka jylla. Kum kine ki jingia phylliew jingmut kan pynsngewthuh ia ki nongthoh kotkhubor shaphang ka jinglong ha ki shnong ki thaw, ka ioh ka kot bad ka shynshar khadar bad ka jingshim khia ka sorkar ha ka roi ka par.
La khmih lynti ba lyngba kane ka jingwan jngoh ki nongthoh kotkhubor, kan don pynlong ia ka jingiadei lok hapdeng ki kotkhubor bad ki tnad treikam sorkar ha kine ki ar tylli ki jylla da kaba plie ia ki lad jingiakren bad ia phylliew jingmut lang.
La pynlong ia kane ka Media Tour hapoh ka jingialam ka Ms. Jaydcevi Pujari Swami, ka Deputy Director, PIB Mumbai da ka jingkyrshan lang ka PIB Shillong, PIB Guwahati bad ka DDK Shillong. Kiba don bynta lang ha kane ka Media Tour ki long ki lad pathai khubor jong ki Marathi, Hindi bad Phareng.
