Mynta ka sngi ka kynhun ba 25 ngut jong ki riew ialehlaitluid jong ka Ri Bangladesh kila wan poi ha nongbah Shillong na ka bynta ban wan jngohkai sngewbha ia ki thaiñ jong ka Ri Lum Khasi kaba dei shi bynta na ka jingrakhe laitluid jong ki ar Ri ka India bad Bangladesh.
Ia kane ka kynhun jong ki 25 ngut la ialam da u Haroon Habib bad la pdiang sngewbha ia ki da u bah F.R. Kharkongor, Commissioner & Secretary, Arts & Culture bad u bah K.L. Nongbri Joint Secretary, Arts & Culture ha U Soso Tham Auditorium, Shillong.
Kane ka jingwan ka jingwan iuhkjat sha Ri India ka long ruh shi bynta na ka jingrakhe ryngkat ia ka jingdap 50 snem jong ka thma ialeh laitluid ka Ri Bangladesh bad ka jingdap 75 snem ka jingiohlaitluid ka Ri India (Azadi Ka Amrit Mahotsav). Kine ki 25 ngut ki dei kiba iadon bynta ha ka jingiakhun ia katei ka thma ialehlaitluid ka Bangladesh na ka kti jong ka Pakistan ha u snem 1971.
Ha kane ka jingwan iuhkjat katei ka kynhun kala leit ban shangkai sha ki lum ba pynngat jong ka Ri Khasi kaba kynthup ruh ia ka Mawphlang Sacred Grove ban ioh jingtip shaphang ka rukom pynneh pynsah jong u Khasi ia ki khlaw ki btap ha ryngkat ka riti ka dustur.
