U Lat ka jylla u Satya Pal Malik mynta ka sngi ula hiar sha ka shnong Nartiang, West Jaiñtia Hills District, ban leit jngoh kyrpang ïa ki ar tylli ki jaka kata ïa ka (Mandir) jaka lehñiam jong ki Hindu bad ïa ki Mawbynna jong ki longshwa manshwa kaba dei kawei na ki jaka jngohkai ba khring bha ia ki nongshangkai.
U Lat ka jylla hashwa ba un leit rung nyngkong hapoh Mandir Nartiang Durga Temple kaba la rim tam hapoh ka West Jaiñtia Hills District, la pdiang sngewbha ïa u da ka Dorbar Shnong Nartiang naduh u Wahheh Shnong ma Mom Phalangki, Secretary ma Sati Swer, Acting Dolloi ma Kloi Pale, ki Pator ki Wasan, ki dkhot ka Executive Committee, ki riewpaidbah bad ki khynnah skul ka Rama Krishna Mission Secondary School Nartiang bad la pynkup burom ïa u Lat ka jylla.
Na ka liang u Secretary ka Dorbar Shnong Nartiang ma Sati Swer ula ong ba mynta ka sngi kila ïoh lad ban aiti ïa ka Dorkhas (Memorandum) ha u Lat ka jylla da kaba kyrpad na u ba un ïarap pynshna ïa ka kynroh sawdong ha ki bynta ka Mandir, kumjuh ruh ïa ka Surok (Internal road) naduh Main Road shaduh ki jaka ba don ki mawbynna, ban pynshna ïa ki jingtei kynroh sawdong ha ki pung hapoh ka shnong bad ïa ka jaka shongthait na ka bynta ki paidbah ba wan shangkai hapoh ka jaka ba don kine ki Mawbynna.
Hadien ba la wanphai na Nartiang u Lat ka jylla u Satya Pal Malik ula leit hiar sa ha Syntu Ksiar ban leit jngoh ïa u Mot sah nam jong u khla wait ka Ri-Lum Jaiñtia u Woh Kiang Nangbah, hangne la synrang ïa u Lat da u Deputy Commissioner ka West Jaiñtia Hills u bah Garod L.S.N. Dykes, IAS, u Superintendent of Police Bikram D. Marak MPS, ki ophisar sorkar, ki dkhot ka Jaiñtia Iasiat Khnam Kiang Nangbah Memorial Society (JIKKNMS) bad kiwei de.
Hangne u Lat ula leit buh ïa u syntiew ha trai jong u mot Kiang Nangbah da ka jingkyrkhu kyrdoh bad ula ïaid sawdong ïa u mot kum ka dak ka jingburom ïa utei u Khlawait ka Ri.
