Jowai : Ka Dean Dayal Upadhaya Community College for skill Development (DDUCC) ka College kaba don ha shnong Wahiajer, West Jaintia Hills District, ka dei kawei na ki College hapoh ka Jylla Meghalaya, kaba ai jinghikai pyntbit ia ki khun samla ha ki line jingpule ki bapher bapher. Ia kane ka Community College kaba la sdang treikam la wan peit wan jngoh da u Dr. Prabha Shankar Shukla, Vice Chancellor ka Skul bah North Eastern Hill University (NEHU) Shillong, ha kane ka 14 tarik mynta u bnai, ha ryngkat ka jingiasynranlang u Prof. Henry Lamin, Principal ka DDUCC Wahiajer, Dr. J.N. Nayak, Registar NEHU, Prof. D. Walia Geology Department NEHU bad u Dr. D. Wargis.
Ha shwa ba u Dr. Prabha Shakar Shukla, Vice Chancellor ka North Eastern Hill University, un wan peit wan jngoh ia kane ka iingskul jong kane ka College bad ban lap ka ki jingduna bad ban pynbiang ia ki jingdonkam jong kane ka College la pynlong ia ka jingialang kaba lyngkot ha Ophis jong ka Veterinary Wahiajer, hapoh ka jingpyniaid jong u Prof.D. Walia, ha kaba u Vice Chancellor ka NEHU, u la ioh ia ka jingpdiang burom da ki Samla pule jong kane ka College bad da ki nongkitkam shnong jong ka shnong Wahiajer.
U Prof. Prabha Shankar Shukla, Vice Chancellor ka NEHU, u la pynpaw ia ka jingkmen ka bakhraw haba u la iohlad ban wan jngoh hi dalade ia kane ka College bad ba yn thaw ki lad ki lynti jingiarap ia ki jingdonkam jong kane ka College bad ia ka jingdonkam jong ki samla pule, kum ki Hostel na ka bynta ki khynnah shynrang bad na ka bynta ki khynnah kynthei bad kiwei de ki jingdonkam jong kane ka College kiba dangdei ban pynmiat pynbha. U la pynpaw ruh ia ka jingsngewnguh kaba shikatdei eh ia ka shnong Wahiajer kaba la kloi ban ai sngewbha ia ka jaka jong ka shnong kaba heh haduh 17 ekar na ka bynta ban tei ia kane ka College, ka College ka ban kyntiew bad pyntbit ia ki samla pule ha kiba bun ki liang jingpule ka juk mynta la ha ka kam rep kam riang, Electronic, Welding, food processing, weaving, horticulture, food technology bad kiwei de ki rukom jinghikai. Ha ka juh ka por u Vice Chancellor, u kyntu ia ki samla jong ka thain West bad East Jaintia Hills ba kin ia wan ban pule ha kane ka College bad u ngeit skhem ba hapoh ka jingpyniaid jong u Prof. Henry Lamin, Principal, kane ka College kan iaid shaphrang ha ki por bad ki sngi kiba dangwan.
Ha kane ka sngi la ioh ruh ia ki jingkren sneng kren kraw bad jingkyntu kynpham kiba sngewtynnat ia ki samla pule kynthup ia u Prof. Henry Lamin Principal DDU, Dr. J. N.Nayak, Dr. C. Wargis bad ha kane ka sngi la ia donlang ruh ka Kong E. Blah, Principal Kiang Nangbah Government College, Jowai.
